Sopranoya navdar a Kurd Pervîn Chakar, li Ameda Bakurê Kurdistanê dê perwerdeyeke masterclass a muzîkê bide.

Perwerde dê di navbera 10-11ê Îlonê de li Navenda Çand û Kongreyê ya Çand Amedê bê dayîn û 2 rojan biajo.

Hat ragihandin ku ji bo perwerdeyê dê 10 ciwanên jêhatî yên di navbera 18 û 30 salî de bên hilbijartin.

Ew ciwan dê 2 rojan ji Chakarê perwerdeya şanê ya taybet (yek bi yek) werbigirin û di dawiya bernameyê de li gel wê derkevin ser dikê û konserekê bidin.

Serlêdan heta 1ê Îlonê ye

Dîroka dawî ya serlêdanê 1ê Îlona 2025an e. Namzed divê qeydên vîdyoyê yên ku tê de herî kêm du berheman dibêjin, bişînin navnîşana masterclass.pervinchakar@gmail.com. Yek ji wan berheman jî divê bi Kurdî be.

Ji bo agahiyên berfirehtir serlêder dikarin bi hejmara 0 542 307 57 53 re têkilî daynin.

Sopranoya Kurd mizgînî li ser hesabê xwe yê medyaya civakî belav kiribû û dabû zanîn ku ev xeyaleke wê ya kevn bûye.

Pervîn Chakar kî ye?

Pervîn Chakar sala 1981ê li navçeya Dêrika Çiyayê Mazî ya Mêrdînê ji dayîk bûye.

Ew sala 1995an li Lîseya Hunerî ya Anadoluyê ya Amedê dest bi perwerdeyê kiriye.

Sala 2003yan li Zanîngehê Gaziyê ya Enqereyê, Beşa Hunerê ya Deng xwendiye.

Chakar sala 2008an ji Konservatuara Dewletê ya Perugîayê di asta “herî baş” de destûrname wergirtiye.

Li heman konservatuarê master bi dereceya herî bilind xwendiye.

Hunermenda Kurd Pervin Chakarê di gelek pêşbirkên operayê de xelat wergirtine.