Rayedarekî rejîma Îranê ev yek eşkere kiriye

Endamê civata diyarîkirina berejwendiyên rejîma Îranê Mihemed Sedir di hevpeyvîneke xwe de ya li gel rojnameya cîhana abûrî ( Dunyaya Îqtisad) ya Îranê rexne li rejîma Îranê kiriye û gotiye dîplomasiya Îranê rastî şikesteke mezin hatiye.

Mihemed Sedir diyar kiriye ku, jiber dronên Îranî, Rûsye li ser asta cîhanî derbeke dijwar li Îranê daye û bikar anîna dronên Îranî ji aliyê Rûsyeyê ve bûye sedem ku, dorpêçên cîhanî yên dijî Îranê gelek berfiretir û dijwartir bibin.

Ev endamê civata diyarîkirina berejwendiyên rejîma Îranê tekez li ser vê yekê kiriye ku, Îran di warê dîplomasî de şaştiyên mezin kiriye, pişta xwe tenê bi Rûsye û Çînê ve girê daye lê ev her du welatên han jî tenê jiber berejwendiyên xwe li gel Îranêne û Rûsye di warê firotina petrolê de jî derbên dijwar li Îranê daye û dixwaze di şûna Îranê, petrola erzan radestî Hindistan û Çînê bike.

Mihemed Sedir balkêşandiye ser xwepîşandanên li Îranê û gotiye xwepîşandan niha tenê siyasîne lê di rojên pêşiya me de dema rejîm jiber dorpêçan nikarî mûçeyên karmendên xwe bide, vê demê jî xwepîşandanên abûrî jî destpê dikin û ev jî encama şaştiyên dîplomatîkî yên rejîmê ne û bandorên gelek xirab li ser rejîmê dikin.