Baykota perwerdeyê li Tirkiyê û Bakurê Kurdistanê ya li ser bangawaziya 14 sendîkayên perwerdeyê ku 300 hezar endamên wan hene, destpê kir.

14 sendîkayên perwerdeyê îro Çarşemê 2ê Mijdara 2022yan li seranserê Tirkiye û Bakurê Kurdistanê, li dijî Yasaya Pîşeya Mamostatiyê kar boykot dikin.

Di çarçoveya rawestandina kar de li hin dibistanan pankart hatin daliqandin û herwiha mamoste neçûn ser kar.

Li Qada Ulusê ya Enqerê girseyeke ji karmendên perwerdeyê kom bû û banga hikûmetê kirin ku daxwazên wan were cîbicîkirin.

Sendîkaya Kedkarên Perwerde û Zanistê (Egitim-Sen) piştgirî dide biryara 14 sendîkayên perwerdê, lê Turk Egtim Sen ku nêzîkê MHPê ye beşdarî çalakiyan nabe.

Egitim Bir-Sen ku ew jî sendîkayeke perwerdeyê wm duh 1 Mijdarê li dijî wê yasayê bo dema demjimêrekê dersê boykot kiribû.

Ew sendikayên perwerdeyê dibêjin pêwîst e ew yasa were hilweşdan û  herwiha daxwaz dikin, bi awayekî lezgîn ezmûna kariyerê ku biryar e 19ê mehê bê kirin were hilweşandin.

Di heman demê de sendîka daxwaz dikin mûçeyê mamosteyan were zêdekirin û dibêjin mûçeyê niha mamosta werdigrin di jêr asta hejariyê de ye.

Daxwazên sereke yên sendikaya ev in:

-Hilweşandina azmûna kariyerê ku dê di 19ê Mijdarê de were kirin

 -Ji bo hemû karmendên perwerdehiyê bê cudahî dayîna alîkariya amadekariyê ya sala xwendinê bi qasî mûçeyekê

-Ji bo hemû karmendên perwerdehiyê zêdekirina meaş

-Bidawîkirina mulkatê

-Li gorî prensîba dewleta civakî, hemû karmendên perwerdehiyê bê cudahî; alîkariya cil û berg, veguhestin, cihê manê, xwarin, sotemenî û alîkariya kirê werbigire

-Dawî li neheqiya bacê were kirin

 

Rudaw