Desteya Mafên Mirovan a Iraqê amara qurbaniyên xwepêşandanên çend rojên bihorî yên li parêzgeha Besrayê aşkere kir.



Îro Pênşembî 6ê Îlona 2018, Desteya Mafên Mirovan a Iraqê bi daxuyaniyekê amara kuştî û birîndarên xwepêşandanên li Besrayê ragihand.



Di daxuyaniya xwe de, Desteya Mafên Mirovan a Iraqê diyar kir, ku di xwepêşandanên çend rojên derbasbûyî de 9 kes ji aliyê hêzên ewlehiyê yên Iraqê ve hatine kuştin.



Heman desteyê herwiha daye xuyakirin, ku di aloziyên navbera xwepêşanderan û hêzên ewlehiyê de, 93 kes jî birîndar bûne.



Ji ber nebûna xizmetguzariyên bingehîn ên weke kêmiya elektirîkê û ava vexwarinê, nebûna derfetên kar, gendelî û guhnedana hikûmeta Iraqê bi parêzgeha Besrayê, ew çend roj in ku welatiyên wê parêzgehê li dijî hikûmetê xwepêşandanê dikin.



Xwepêşanderên nerazî heta niha çendîn ofîs û baregehên ser bi hikûmetê û hin partiyên siyasî li Besrayê şewitandine.



Doh bi şev xwepêşanderên bi hêrs avêtin ser avahiya Şaredariya Besrayê û agir berdane wê avahiyê û şewitandin.



Herwiha hejmarek ji xwepêşanderan jî rêya Bendera Um El Qesrê ku bendera stratejîk û cihê hinardekirina petrola Iraqê ye, li ser hatinûçûnê daxistin.

Rudaw