Wezareta Derve ya Rûsyayê li hember tewanbariya rêvberiya Tirkiyê de ku ragihandibû divê Moskow li dijî terorîstan, hevkarî bi terorîstên din re neke, got, balkêş e ku Tirkiye behsa xirabiya hevkariya bi terorîstan re dike. Pisporekî Rûs jî da xuyakirin, ku ne Moskow û ne jî Washington hêzên Kurdî weke metirsî nabînin.

Berdevka Wezareta Karûbarên Derve ya Rûsyayê Marîya Zaxarova îro di bersiva pirsyareke Tora Medyayî ya Rûdawê de got, balkêş e ku aliyê Tirkiyê behsa xirabiya hevkariya li gel terorîstan dike.

Mariya Zaxarova ragihand: “Rêveberiya Rûsyayê çendîn caran tekez kiriye ku pêwîst e hêz û bizavên kurdî, di hemû proseyan de beşdariyê bikin. Ji ber ku ew, li ser erdê xwedî roleke pir çalakin. Û ew hêz, ew bizav û ew partiyên siyasî nûnertiya gelekî pirhejmar dikin. Ew jî xwedî berjewendiyên xwe ne, û di gelek pirsên navneteweyî de jî, roleke giring dilîzin.”

Aşkere ye, ku mijara gotinê hevkariya Rûsyayê li gel PYD û YPG êye. Û Zaxarova da zanîn ku rêveberiya Rûsyayê van rêxistinên kurdî wek hêzên giring ên di şerê dijî terorê de dibîne.

Serokomarê Tirkiyeyê di serdana xwe ya dawîn a bo Moskowê de jî mijara PYD anîbû rojevê, lê ji aliyê rûsî ve bersiveke misoger wernegitibû.

Pisporê Rûs dibêje, ne Moskow û ne jî Waşington kurdan wek metirsî nabînin û pêwîst e Enqerê jî ji hêlên xwe yên sor tawîzan bide.

Hevkakriya Moskowê bi YPGê re hevsengiya hêzan û rêbazên lîstikê li herêmê ji guherandiye û ew yek jî bi xwe re dirêjbûna proseya çareseriya sîyasî tîne. Her ji ber vê yekê ye, ku piraniya çavdêr ji encamên gotûbêjên Cenev-5 jî ne geşbînin.

Pisporê Rûs ê di warê Sûriye û Tirkiyeyê de Andrey Çûprigîn di daxuyaniyekê de ji Rûdawê re dibêje: “Di rastiyê de, qaşo bidawîbûna operasyona Mertala Firatê nîşan da, ku armanca Tirkiyê ne şerê li dijê terorê, lê şerê dijî kurdan e. Û Tirkiye li ber sînorên xwe, kurdan wek metirsî dibîne. Lê Rûsya wisa nabîne, û Amerîka jî wisa nabîne. Weke ez tê digihîjim, li ser pirsa kurdî êdî xebateke hevbeş a di navbera Rûsya û Amerîkayê de tê meşandin. Erdoxan nikare dijî vê yekê derbikeve. Lewma jî, diyar e ku ew neçar bimîne ku ji pêgeha xwe hin tawîzan bide.”

Rudaw