Li Kurdistana Rojava, hêzek çekdar bi navê “Ketaêb Suwar El Kurd” (Yekîneyên Şoreşgerên Kurd) li dijî YPG û PYDê hat avakirin. Rayedarekî PDK-Sê jî dibêje, eger Barzanî neba dê ji mêjve li Rojava şerê birakuyiyê biqewimiya.

Di vîdyoyekê de ku li ser Youtube hatiye belavkirin, tê dîtin ku komek çekdar bi kincên kurdî dijîtiya xwe li hember YPG û PYDê nîşan didin. Koma han her wiha bi tundî PKKê tehdîd dikin û wê rêxistinê bi “reşkirina rûmeta kurdan” li Kurdistana Rojava tohmetbar dikin.

Li gorî wê vîdyoyê, wê koma çekdar navê xwe daniye “Yekîneyên Şoreşgerên Kurd” û li Efrînê li dijî rêjîma Beşar Esed û PKKê şer ragihandiye.

Di vîdyoyê de berdevkê wê komê, bi tundî êrişî PKKê dike û dibêje, endamên PKK tenê dixwazin li Rojava hinek pere bidest bînin û derbasî Ewropa bibin.

Endamê serokatiya Partiya Demokrat a Kurdistanê – Sûriye (PDK-S) Kawe Ezîzî li ser rewşa Rojava ji Basê re got, YPG û PYDê wisa li Rojava kirine êdî tehemula xelkê nemaye.

Kawe Ezîzî her wiha got, eger Barzanî (Serokê Herêma Kurdistanê) neba û hêzên Rojava yên ne alîgirên PKKê kontrol nekira, dê ji mêjve şerê birakujî li Rojava derketa. Çimkî PKK xwe bi ser xelkê de disepîne.

Wî rayedarê PDK-Sê anî ziman ku derketina komên mîna “Ketaêb Suwar El Kurd”, li derveyî siyaseta partiya wan e û gunehê wê yekê li stûyê PKKê de ye.

Nûnerê PYDê li Herêma Kurdistanê, Şêrzad Êzîdî jî li ser avabûna koma çekdarî ya “Ketaêb Suwar El Kurd” ji Basê re axivî û bi tundî êrişî wan kir. Li gorî Şêrzad Êzîdî, ew “xayîn, caş û zilamên Tirkiyê ne”.

Nûnerê PYDê li Herêma Kurdistanê her wiha anî ziman ku ew kom ji aliyê Tirkiyê ve hatiye avakirin çimkî Tirkiye serkeftina kurdan li Rojava tehemul nake.

Basnews