Li Kobanî, tenê 2 gund mane hêzên kurdî xwe bigihînin Çemê Firatê. Pêşveçûna li aliyê Girê Spî jî didome.

Fermandarê Pêşmerge li Kobanî emîd Muslih Zêbarî ji Rûdawê re ragihand ku hêzên pêşmerge li herêma Kobanê hatine belavkirin.

Zêbarî got, tenê 2 gund mane ku hêzên Kurdî bigihên Çemê Firatê û dê pişt re berê xwe bidin başûrê Kobanî.

Muslih Zêbarî diyar kir ku topbarankirina gundên li rojhilat û başûrê Kobanî berdewam e û îro 3 gundên nû li rojhilatê Kobanî hatin kontrolkirin.

Wî fermandeyê Pêşmerge eşkere kir ku hêzên kurdî ligel hêzên Şems El-Şemal ber bi bajarê Reqayê yê Sûriyê ve diçin û wan karîn girekî stratîjîk kontrol bikin ku ew gir li ser rêya bajarê Girê Spî (Til Ebyed) ye.

Hêzên kurdî di nava gundên Girê Spî de 5 km pêşve çûne û % 5ê gundên Girê Spî ji çekdarên DAIŞê paqij kirine û niha 7 gundên Girê Spî hatine kontrolkirin.

Derbarê belavbûna şervanên Artêşa Azad a Sûriyê li wê deverê, çavkaniyeke taybet ji Rûdawê re got, şervanên Lîwaya Siwar Reqa li aliyê rojhilatê Kobanî bicîh bûne, şervanên Lîwaya Şems el-Şîmal li aliyê başûr li ser rêya navdewletî ya di navbera Heleb û Hesekê de, ku bi navê Rodko tê naskirin, bicîh bûne, herwiha şervanên Ehrar Cerablus jî li aliyê rojavayê Kobanî cihê xwe girtine.

Rudaw