Hêzên Pêşmerge û şervanên Yekîneyên Parastina Gel (YPG) li Kobanî 50 gundên din ji destê çekdarên DAIŞê derxistin.

Peyamnêrê Rûdawê li eniya şer li Kobanî Imer Kalo ragihand ku hêzên kurdî li hersê çeperên şer li Kobanî pêşde diçin û heta niha zêdetirî 150 gund kontrol kirine.

Imer Kalo got ku li rojhilatê Kobanî bi derdora zêdetirî 25 kîlometran, şervanên YPGê bi piştgiriya topbarana Hêzên Pêşmergeyên Kurdistanê û bombebarana balafirên hevpeymaniya navdewletî, gundê Qeremux derbaskirine û ber bi gundê Bexdikê ve pêşde diçin û nêzîkî gundên Til Ebyedê bûne.

Herwiha li aliyê başûrê Kobanî jî bi derdora 30 kîlometran, hêzên kurdî li başûrê gundên Qumçî û Berxbatanê ber bi çerxerêya Sirînê ve pêşde diçin.

Peyamnêrê me diyar kir ku li rojavayê Kobanî jî bi derdora 30 kîlometran, hêzên kurdî li derdora gundên Cibnê û Pendir ber bi çemê Ferat û bajarokê Şiyûx ve pêşde diçin.

Kalo anî ziman ku hêzên kurdî zêdetirî 150 gundên Kobanî ji destê çekdarên DAIŞê rizgar kirine û dema ragihandina rizgarkirina tevahiya hemû gundên Kobanî nêzîk bûye.

Rudaw