Komîteya têkeliyên derve ya Koma Civakên Kurdistanê (KCK) derbarê xweseriya Şingalê de bersiva daxuyaniyên berpirsên Partiya Demokrat a Kurdistanê (PDK) dide û dibêje, ew helwesta PDKê xizmeta yekîtiya neteweyî nake.


Komîteya Têkeliyên derve ya KCKê di daxuyaniyekê de diyar dike ku berpirsên PDKê li hemberî banga xweseriya Şingalê nerazîbûna xwe tînin ziman û bi gotina KCKê, xweserî, daxwaza civaka êzîdî ye û divê hemû hêz rêzê li xwesteka wan bigirin.

Di daxuyaniyê de hatiye gotin ku helwesta hinek berpirsên PDKê xizmeta yekîtiya neteweyî nake û pêwîst e ew êdî helwestên wiha nîşan nedin.

Hevserokê KCKê, Cemîl Bayik û hevserokê HDPê Selahedîn Demîrtaş piştî kontrolkirina beşekî bajarê Şingalê ji aliyê Hêzên Pêşmerge ve, daxwaz kirin ku Şingal bibe herêmeke xweser. Medya û berpirsên PDKê jî ew daxuyanî bi tundî rexne kirin.

Jêder: Rudaw