Biryar e Encûmena Parêzgeha Nînewa li bajarê Hewlêrê kongreyekê bi navê ‘Rizgarkirina Asayîşa Nînewa’ lidar bixe û têde biryara pêkanîna hêzekê bo rizgarkirina Mûsilê bide.

Di vê derbarê de Endamê Encûmena Parêzgeha Nînewa Xelef Herîrî ji BasNewsê re got: ‘’Hefteya dahatû li bajarê Hewlêrê kongreyek bo rizgarkirina asayîşa Nînewa tê girêdan. Di kongreyê de Serokê Parlamentoya İraqê Selîm Cibûrî, nûnerên Nînewa yên li Parlamentoya İraqê û hejmarek efserên payebilind ên artêşa İraqê amade dibin.’‘

Herîrî tekez kir ku di kongreyê de biryara pêkanîna hêzeke ewlekariyê bo rizgarkirina bajarê Mûsilê tê standin û herwiha encûmeneke siyasî û leşkerî jî bo serpereştîkirina dosya ewlekariyê ya Nînewa tê pêkanîn.

Berî niha hatibû îdîakirin ku efser û fermandeyên xelkê Nînewa yên di nav artêşa İraqê de bi mercê îstîfakirina Parêzgarê Nînewa Esîl Nûcêfî, amadebûna xwe pêşan dane ku tevlî proseya rizgarkrina Mûsilê bibin.

Basnews