‘Zêdeyî 300 hezar Kurdên Êzdî koçber bûne’
Berpirsekî Êzdiyan jî da zanîn ku ji ber nebûna xwarin û vexwarinê rewşa Êzdiyan xirab e û çendîn kes jî ji wan hatine kuştin û got: ‘’Em daxwazê ji aliyên peywendîdar dikin ku berî çekdarên DAİŞ’ê komkujiyekê bikin, bi hewara me ve werin.’‘
Hesen Hadî ku xelkê Şengalê ye û ji ber çekdarên DAİŞ’ê koçberî Herêma Kurdistanê bûye, derdê dilê xwe wiha anî ziman: ‘’Kurdên Êzdî di rewşeke xirab de dijîn û her roj xelkê Şengal û derdora wê ji navçeyê koç dikin, eger ne ji Pêşmergeyan bûya niha rewş gelekî xirabtir bû, lê dîsan jî em daxwaza hevkariya zêdetir dikin û divê aliyên peywendîdar bi hewara me ve werin.’‘
Kurdekî din ê Êzdî bi navê Newaf Meyser jî wiha axifî: ‘’Niha bi sedan Êzdî mil bi milê Hêzên Pêşmerge şerê çekdarên DAİŞ’ê dikin. Herwiha em daxwazê ji Serokê Herêma Kurdistanê dikin ku şekan bidin me da em biçin cepheyên şer û di demeke nêzîk de çekdarên DAİŞ’ê ji navçeyê derxînin.’‘
Ji aliyekî din ve Serokê Encûmena Parêzgeha Duhokê Fehîm Ebdulla da zanîn ku zêdeyî 40 hezar hevwelatiyên Êzdî koçberî Xankê û Şarya bûne û heta niha jî koçberbûna Kurdên Êzdî bo Herêma Kurdistanê berdewam e.
Fehîm Ebdulla got: ‘’Me wek parêzgeha Duhokê lijneyek pêkaniye bo hevkarîkirina koçberan û Dezgeha Xêrxazî ya Barzanî jî kariye alîkariyê bighîne koçberan. Herwiha em daxwazê ji rêxistinên civaka sivîl û xêrxwaz dikin ku hevkariya koçberan bikin. Eger hejmara koçberan jî zêde bibe em ê du kampan ji wan re vekin û hemû koçberan li wir bicîh bikin.’‘
Derheqa koçberbûna Êzdiyan de, Rêveberê Karûbarê Êzdiyan li Wezareta Ewqafê ya Kurdistanê Hadî Dubanî jî wiha axifî: ‘’Heta niha zêdeyî 300 hezar kes ji xelkê Şengal û derdora wê koçberî Herêma Kurdistanê û navçeyên din bûne, hatin jî berdewam e. Herwiha zêdeyî 20 hezar hevwelatiyên Êzdî li çiyayê Şengalê vehewiyane û çendîn zarok û pîran jî canê xwe ji dest dane. Lewra eger çareseriyek ji van hevwelatiyan re neyê dîtin karesateke însanî çêdibe.’‘
Basnews
