Çalakvanekî Kurdê Êzdî ji Şingalê ragehand ku piştî kuştina çar hevwelatiyên Êzdî ji aliyê komên Îslamî ve bi hezaran cotkarên Êzdî ji nehya Rebîa koçber bûne.

Di vê derbarê de Endamê Fraksyona Kêmnetewên İraqê Hecî Elî Xetarî ji BasNewsê re got: ‘‘Piştî kuştina çar cotkarên Êzdî ji aliyê komên radîkal ên Îslamî ve 1000 malbatên Kurdên Êzdî ji nehya Rebîe ya ser sînorên Iraq û Sûriyê koçber bûne û ber bi Şingalê ve çûne.’‘

Xetarî wiha axifî: ‘‘Bi hezaran malbatên Êzdî salane bi mebesta cotkariyê ji Şingalê ber bi nehya Rebîa ve dicin lê neha piraniya wan malbatan ji tirsa êrîşên komên Îslamî yên radîkal mal û ajelên xwe bicîh hiştine û koçber bûne.’‘

Xetarî daxwaz ji aliyên peywendîdar kir ku pêngavên cidî bavêjin bo başkirina rewşa Kurdên Êzdî û rê li koçberiya wan bigrin. Xetarî wiha dirêjî bi axaftina xwe da: ‘’Divê di warê aborî de hevkariya wan bê kirin û li navçeya Kurdên Êzdî projeyên xizmetguzariyê werin cîbicîh kirin.’‘

Ji aliyekî din ve çavkaniyeke ewlekarî tekez kir hefteya borî du cotkarên Êzdî ji aliyê çekdarên Dewleta Îslamî ya Iraq û Şamê (DAÎŞ) ve li nehya Rebîe ya ser sînorê Iraq û Sûriyê hatine kuştin.

Hêjayê gotinê ye Kurdên Êzdî herî zêde li parêzgeha Mûsil û Duhokê dijîn. Tê gotin ku hejmara Êzdiyên li Iraq û Herêma Kurdistanê 500 hezar e. Di demên dawî de ji ber êrîş û şer hinek malbatên Êzdiyan koçî welatên Ewropayê kirin. Li Ermenistan û Gurcistanê jî gelek Ezdî hene. Lê belê piştî hilweşîna rejima Sowyetê gelek Êzdiyan di serî de Almanya koçî welatên Ewropayê yên cuda kirin.

BasNews