Bi çavdêriya Hakimê Dubaiya Îmarat Mihemed Bin El-Raşid, doh (04.05.2014) Desteya Geştûguzarî ya Herêma Kurdistanê beşdarî Fuara Navdewletî ya Dubaî bo pêşandana bazirganîkirina geştûguzarî bû.

Derbarê fuarê de Berdevkê Desteya Geştûguzarî ya Herêma Kurdistanê Nadir Rostî agahî dan BasNewsê û got: ‘’Grûbeke zêdeyî 25 kesan ji Herêma Kurdistanê bi serpereştiya Desteya Geştûguzarê beşdarî pêşangehê bûn û çendîn babetên cuda yên geştyarî wek fîlm, delîl, nexşe, buroşûr, tabloyên fotografî, diyarî û xwarinên hişkkirî yên Kurdî di jêr ala Kurdistanê de û bi cilên Kurdî pêşkêşî mêvan û geştyaran kirin.’‘

Rostî wiha axifî: ‘’Armanca vê beşdarbûnê jî ew e ku bikaribin zêdetirîn geştyar û şirketên geştyarî bo Herêma Kurdistanê rabikşînin û Kurdistan di warê geştyarî de bikeve ser nexşeya geştyarî ya cîhanê. Pêşangeh heta 08.05.2014’ê berdewam dibe, herwiha di 7’ê mehê de Desteya Geştûguzarî ya Herêma Kurdistanê li Hotêla Xebtûr a Dubaî bi beşdarbûna zêdeyî 200 mêvan, şirket û dezgehên ragehandina Erebî û cîhanê Konferansa Geştûguzarî ya Herêma Kurdistanê lidar dixe.’‘

Hêjayê gotinê ye 16 şirketên geştyarî yên Herêma Kurdistanê û zêdeyî 3 hezar û 500 şirketên cîhanî beşdarî Fuara Navdewletî ya Dubaî (İTM) bûn û 2 hezar û 600 stand hatibûn vekirin bo pêşandana kelûpelên geştûguzarî.

BasNews