Parêzgarê Kerkûkê Necmedîn Kerîm ragihand ku di şerê duh yê li nêzîk avahiya îstixbarata Iraqê li bajarê Kerkûkê de 4 kesan jiyana xwe ji dest da û 6 çekdar jî hatin kuştin.

Duh piştî nîvro otombêleke bombekirî li ber avahiya dezgeha îstixbarata Iraqê li bajarê Kerkûkê teqiya û piştî teqînê hejmarek çekdar êrîşî avahiyê kirin û xistine bin kontrola xwe û piştre şer û pevçûn di navbera êrîşkeran û hêzên ewlekariyê de derketin.



Necmedîn Kerîm derbarê bûyerê de ji radiyoya Dengê Amerîka re got ku destpêkê kesekî xwe ku bi otombêlekê çû nav avahiya îstixbaratan li Kerkûkê û xwe teqand û piştre 3 çekdarên din êrîşî avahiyê kirin.

Kerîm aşkere kir ku çekdaran nikarî derbasî avahiyê bibin û di avahiya li hemberî avahiya îxtsixbaratan asê man û 11 kes wek dîl girtin û axaftina xwe wiha domand: “Terorîstan di pilana xwe sernekeftin û hêzên asayiş û polîsê karîn her 11 kesên dîl aza bikin”.

Parêzgarê Kerkûkê herwiha got “Di êrîşê de 4 kes şehîd ketin û bi kêmanî 6 terorîst hatine kuştin û 2 bi birîndarî hatine girtin ku yek ji wan birîna wî sivik e û yê din birîna wî giran e”.

Necmedîn Kerîm aşkere kir ku yek ji “terorîstên” êrîşa duh a Kerkûkê xelkê bajarê Helebce bû û ji Sûriyê vegeriyabû û ligel wan “terorîstan” hatibû Kerkûkê.

Rudaw