Asayîşa Silêmaniyê ragehand ku 63 ciwanên Kurd çûne nav grubên Îslamî yên li Sûriyê bi navê cîhadê şer dikin û bal kişand ser wê yekê ku hinek ji wan ciwanan li Rojavayê Kurdistanê bo şerê dijî Kurd hatine bikaranîn.

Di beyannameya Asayîşa Silêmaniyê de ku kopiyek ji BasNewsê re hatiye şandin, wiha tê gotin: ‘’Me wek Rêveberiya Asayîşê piştî ku bi hewldanên wan grubên hesiyan, tedbîrên pêwist wergirtine. Herwiha li gor yasa ew kes tên girtin û dadgehkirin, heta niha jî 16 kes bi tohmeta terorê hatine girtin û dadgehkirin.’‘

Beyanname wiha berdewam dike: ‘’Şoreşa Sûriyê bandor li İraqê kir û ji wir jî kêm zêde gehişte Herêma Kurdistanê û niha tesîra wê dixwiye, vêna derfet ji hinek kesan re çêkir ku bala ciwanên Herêma Kurdistanê bi navê ola Îslamê ya pîroz bi aliyê ‘cîhadkeran’ ve bikşîne û berê xwe bidin wî welatî.’‘

Li gor beyannameya Asayîşê, ew ciwanên ku diçin Sûriyê, diçin rêza rêxistinên ‘terorîst’, ji wan Cepheya El-Nusra, Ketîbeya Mihacirîn û Ensar, Dewleta Îslamî ya İraq û Şamê û Artêşa Azad a Sûriyê.

Di beyannameyê de wiha tê gotin: ‘’Ev ciwanên han wiha tên xapandin ku li dijî birayên xwe yên Kurd derdikevin û şerê wan dikin ku çendîn sal e di jêr zilm û zora dagîrkeran de ne. Bi awayekî ew ciwan tên xapandin ku nizanin ji bo çi armanc û mebestekê ev rêya han dane pêşiya xwe, çima teşwîqkirin, dijî hev şer dikin û ji bo kê xwe didin kuştin.’‘

Beyannameya Asayîşa Silêmaniyê wiha bi dawî dibe: ‘’Hinek ji wan dema vedigerin poşmanbûna xwe tînin ziman û dibêjin me nedizanî ku li dijî gel û neteweya me şer bi me dikin. Dema pê dihisin ku hatine xapandin direvin ku bi rêya Tirkiyê û bi navê geştê çûne Sûriyê yan jî bi rêya deriyên sînor ên Mûsilê. Herwiha li gor yasaya terorê kesên destê wan di xapandina van ciwanan de heye dê bên dadgehkirin û darizandin.’‘

Basnews