سەرەدانا ڤێ دووماهیێ یا مەسرور بارزانی سەرۆکێ حکومەتا هەرێما کوردستانێ بۆ تورکیا و کۆمبوونا وی دگەل سەرۆککۆمار ڕەجەب تەیب ئەردۆغان و بەرپرسێن بلندێن وی وەلاتی وەک وەرچەرخانەکا ستراتیژی د سیاسەتا دەرڤە یا هەرێمێ دا دهێتە هەژمارتن.
هەروەها ئەڤ سەرەدانە د دەمەکێ دا دهێت کو دەڤەر ب گشتی د ناڤ گوهۆڕینێن بلەز و ئالۆزیێن سیاسی و ئابووری و ئەمنی دا دەرباز دبیت ،لەورا ناڤەرۆکا گۆتۆبێژان گەلەک ژ چوارچۆڤەیەکێ تەقلیدی یێ دبلۆماسی بەرفرەهتر بوو.
د تەوەرێ ئابووری دا پرۆژێ رێکا گەشەپێدانێ بابەتێ سەرەکی یێ کۆمبوونان بوو.

مەسرور بارزانی ب دیدەکا روون بەحس ل پێگەیێ جوگرافی یێ هەرێما کوردستانێ کر وەکو ناڤەندەکا گرنگە کو هەرێما کوردستانێ ب وەلاتێن کەنداڤی و ئەوروپاڤە بهێتە گرێدان ، هەروەها ئەڤ پڕۆژە نەبتنێ ژ لایێ بازرگانی ڤە گرنگە بەلکو دێ هەرێما کوردستانێ کەتە پشکەکا سەرەکی ژ نەخشەیێ وزە و ئابووریێ جیهانێ کو ئەڤە ژی دێ دەرفەتێن کاری بۆ گەنجان دابین کەت و ژێرخانەیا ئابووری یا هەرێما کوردستانێ ب هێزتر لێ کەت و هەروەها دێ بیتە ئەگەرێ بهێزا بوونا پێگەهێ هەرێما کوردستانێ ل رۆژهەلاتا ناڤەراست دا.
هەروەها لایەکێ دی یێ گۆتۆبێژان لسەر بابەتێن سیاسی و ئەمنی بووینە کو سەرۆکێ حکومەتێ پەیامەکا ئاشکەرا گەهاندە بەرپرسێن تورکیا کو سەقامگیریا هەرێما کوردستانێ کلیلا ئارامیا هەمی دەڤەرێ یە، و د کۆمبوونێ دا جەخت لسەر وێ چەندێ ژی هاتیە کرن کو پێدڤییە هەماهەنگیەکا زێدەتر هەبیت بۆ پاراستنا سنووران و ڕێگریکرن ل هەر گەفەکێ کو بیتە ئەگەرێ تێکدانا رەوشا ئەمنی و سیاسی و ئابووری ل رۆژهەلاتا ناڤەراست هەروەسا پشتەڤانیا هەرێما کوردستانێ بۆ هەر بزاڤەکا ئاشتیانە و دیالۆگێ ل تورکیا هاتە دوپاتکرن ب وی مەرجێ کو مافێن هەمی لایەنەکێ تێدا پاراستی بن و ل
دوماهیێ ئەڤ سەرەدانە سەلماند کو کابینەیا نەهێ یا حکومەتا هەرێمێ ب سەرۆکاتیا مەسرور بارزانی شیایە هاوسەنگیەکا ژیرانە د پەیوەندیێن خۆ یێن دەڤەرێ دروست بکەت ب هێزکرنا پەیوەندیان دگەل وەلاتەکێ جیران وەک تورکیا نیشانا وێ چەندێ یە کو هەرێما کوردستانێ کار دکەت بۆ ئاڤاکرنا پاشەڕۆژەکا گەش کو تێدا ئابوور و ئارامی ل پێشیا هەمی کاران بیت و ئەڤ بزاڤا دبلۆماسی دێ ئەنجامێن ئەرێنی د دەمەکێ نێزیک دا ل سەر ژیانا وەلاتیان و پێگەهێ سیاسی و ئابووری و ئەمنی یێ هەرێما کوردستانێ نیشان دەت ل دەڤەرێ.