پۆلیسی دارستانی چەمچەماڵ تۆمەتبارێك لە نزیك چەمی باسەڕە لە چەمچەماڵ بە تۆمەتی کوشتنی حاجی لەقلەقێک دەستگیردەکات.

بەڕێوەبەرایەتی پۆلیسی دارستانی چەمچەماڵ هەواڵی دەستگیرکردنی ئەو هاونیشتمانییەی لە پەیجی تایبەتی خۆی لە فەیسبووک بڵاوکردووەتەوە و رایدەگەیێنێت: "بەشی پۆلیسی دارستانی چەمچەماڵ توانیان تۆمەتبارێك لە نزیك چەمی باسەڕە دەستگیربکەن، کە باڵندەیەکی کێوی (حاجی لەقلەق) ی راوکردبوو، لەگەڵ دەست بەسەراگرتنی چەکێك لە جۆری (کڵاشینکۆڤ)".

پەڕاوی لێکۆڵینەوەی بۆ دەستگیرکردنی ئەو هاونیشتمانییە کراوەتەوە و رادەستی دادوەرکراوە بۆ وەرگرتنی رێکاری یاسایی.

پۆلیسی دارستانی چەمچەماڵ ئاماژەیان بەوەداوە "لە کوردستان زۆربەی هاووڵاتیان هەست بە گرنگی و کاریگەری سرووشت دەکەن و بە گیانێكی بەرپرسیارێتیەوە مامەڵە دەکەن، بەڵام هەندێك لە هاووڵاتیان تەنها لەبەر حەزێكی تایبەتی خۆیان دەست دەخەنە سرووشت ژينگە و تێکیدەدەن، چ بە بڕینەوەی داری دارستانەکان یاخود تێکدان و شێواندنی تۆبۆگرافیای سروشت و ژینگە یان لە ناوبردنی ئاژەڵ و باڵندەی کێوی".

لە سەرجەم بەش و بنکەکانی سەر بە بەڕێوەبەرایەتی پۆلیسی دارستان و ژینگەی پارێزگای سلێمانی مەفرەزەکانیان لە گەڕان و پشکنیندان و رێگە لە هەرکەسێك دەگرن کە مەبەستی کاری نایاسای بێت و رووبەڕووی یاسای دەکەنەوە.

سرووشت و ژینگە کاریگەری راستەوخۆی لەسەر ژیانی مرۆڤایەتی هەیە، چ لەڕووی تەندروستییەوە یاخود بەخشینی دیمەن و سیمایەکی جوان و دڵگیر، ئەمانەش دەبنە هۆی ئاسودەبوونی ناخ و دەروونی مرۆڤ و هەروەها راکێشانی گەشتیار بۆ ئەو وڵاتەی کە خاوەنی ژینگە و سرووشتێكی جوان و پاکژبێت.