هێمن هەورامی جێگری سەرۆکی پەرلەمانی کوردستان لە پرێس کۆنفرانسێکدا ئاماژەی بە هەندێ پرسی تایبەت بە دەستوور و هەماهەنگیی پەرلەمانی کوردستان لەگەڵ چین و توێژەکان کرد و جەختی کردەوە دەبێ هەرێمی کوردستان ببێتە خاوەن دەستووری خۆی.

ئەمڕۆ یەکشەممە ٢٢ی٩ی٢٠١٩ لە پەراوێزی سەردانی دەستەی سەرۆکایەتیی پەرلەمانی کوردستان کە بۆ پیرۆزبایی سەردانی مەکتەبی تەنفیزیی یەکێتیی زانایانی ئایینی ئیسلامیی کوردستانیان کردبوو، گوتی: "ئێمە داوامان لە یەکێتیی زانایانی ئایینیی ئیسلامیی کوردستان و مامۆستایانی ئایینی کرد کە ئەوان لە وشیارکردنەوەی خەڵکدا ئەرکێکی ئێجگار گرنگیان لەسەرشانە، بەتایبەت لەو ئەرکە کۆمەڵایەتی و ئایینی و نیشتمانیانەدا کە دەتوانن لە پرسی پێکەوەژیان و پاراستنی ئاشتیی کۆمەڵایەتیدا دەور بگێڕن".

ئاماژەی بەوەش کرد: "داوامان لە یەکێتیی زانایان کردووە لە نووسینەوەی دەستووردا بە هەمان شێوە هاوکارمان بن، چونکە دەستوور ئەوەندەی ڕەهەندێکی سیاسیی هەیە، کەمتر ڕەهەندێکی یاسایی هەیە و داوامان لێکردن لە دروستکردنی ئەو زەمینە سیاسییەدا کە لەم چوار ساڵەدا یارمەتیدەرمان بن و دەبێ هەرێمی کوردستانیش ببێتە خاوەندی دەستوور، چونکە نەبوونی دەستوور وای کردووە دەستی لاوەکی بۆ مەترسی و هەڕەشەدانان لەسەر قەوارەی سیاسیی هەرێمی کوردستان و بۆ کەمکردنەوەی دەسەڵاتە دەستوورییەکانی کوردستان بێتە ئاراوە".

جێگری سەرۆکی پەرلەمانی کوردستان گوتیشی: "داوامان لێکردن ئەوانیش لە ئاست خۆیانەوە لەگەڵ ناوەندە ئایینی و دەسەڵاتەکانی بەغدا پەیوەندییەکانیان توندوتۆڵتر بکەن تاکوو ئەو فکرە و خیتابانەی دژی کوردستانن نەمێنن و لە انوەرۆک بەتاڵ بکرێنەوە و پێویستمان بە بانگەشەیەکی گشتی و دەستپێکردنی دامەزراندنی پەیوەندیی توندوتۆڵی نێوان هەموو لایەن و پێکهاتەکان هەیە".












باسنيوز