بەمەبەستی گەیاندنی دوایین توێژینەوە زانستییەكانی بواری پزیشكی و چۆنیەتیی سوودوەرگرتنی پزیشكانی كوردستان لەو توێژینەوانە، یەكەمین كۆنفرانسی زانستی پزیشكی لە كوردستان دەستی بە كارەكانی كرد كە ماوەی دوو رۆژ بەردەوام دەبێت.

د. كارزان محەمەد، سەرپەرشتیاری گشتی كۆنفرانسەكە لە لێدوانێكدا بۆ ڕۆژنامەنووسان گوتی: "یەكەمین كۆنفرانسە كە لەسەر ئاستی زانستی پزیشكی لە كوردستان دەكرێت و، ئامانجمانە ئەو زانایانەی كە لە زانكۆ و تاقیگەكان كار دەكەن و توێژینەوە و بیردۆزەی تازەیان هەیە، توێژینەوەکان و دوایین زانستی پشكنین و چارەسەرە لە تەندروستی پێشكەش بە پزیشكانی كوردستان بكەن".

گوتیشی: شەش زانكۆی سەرانسەری كوردستان و لە 11 وڵات و 234 توێژەر بۆ ئەم کۆنفرانسە هاتوون و 12 پسپۆڕی جیهانیی ئاستبەرز دوایین پێشهاتەكانی بواری پزیشكی پێشكەش دەكەن و دواتریش لە ماوەی 2 رۆژدا توێژینەوەكان پێشكەش دەكەن".

د. کارزان محەمەد، باسی لەوەش كرد: "ئێستا لە كابینەی تازەدا گرنگی زۆر بە كەرتی تەندروستی دەدرێت و وەزارەتەكانی تەندروستی و کار و کاروباری كۆمەڵایەتی و پلاندانان لەم كۆنفرانسەدا شوێنیان هەیە، تاكوو بتوانن دوایین هەڵسەنگاندن بۆ پرۆسەی توێژینەوەكان بكەن".












باسنيوز