گوته‌بێژى به‌ڕێوه‌به‌رایه‌تیی پۆلیسی سلێمانى ده‌ستگیركردنى باندێكى دزینى ئاسه‌وارى له‌ شارى سلێمانى ڕاگه‌یاند.

نه‌قیب سه‌ركه‌وت ئه‌حمه‌د، گوته‌بێژى به‌ڕێوه‌به‌رایه‌تیى پۆلیسی سلێمانى، ڕايگه‌یاند:"ڕۆژى 9/9/2019 تۆمه‌تبارێكى دانیشتووى شارى سلێمانى چه‌ند گرته‌یه‌كى ڤیدیۆیی بۆ كه‌سێكى به‌ڕه‌گه‌ز ئێرانى ناردووه‌ كه‌ شوێنه‌وارێك بوو له‌شارى سلێمانى، بۆئه‌وه‌ى ئه‌و كه‌سه‌بێت و سه‌یرى شوێنه‌كه‌ بكات و ئاسه‌واره‌كانى ده‌ربهێنن و بیبه‌ن بۆ وڵاتێكى دیكه‌".

گوتیشی: "كه‌سه‌ ئێرانبیه‌كه‌ كه‌ شاره‌زایه‌ له‌ده‌رهێنانى ئاسه‌وار و شوێنناسیدا، سه‌ردانى شوێنه‌كه‌ى كردووه‌ و پاشئه‌وه‌ى دڵنیا بووه‌ له‌وه‌ى شوێنه‌كه‌ ئاسارى تێدایه‌، 3 كه‌سی دیكه‌ى به‌كرێ گرتووه‌ تا هاوكاری بكه‌ن له‌ده‌رهێنان و بردنى ئاسه‌واره‌كاندا، تا ئه‌و كاته‌ى له‌گه‌ڵیدا ده‌بن بۆهه‌ریه‌كه‌یان بڕى 5 هه‌زار دۆلارى داناوه‌".

گوته‌بێژى به‌ڕێوه‌به‌رایه‌تیی پۆلیسی سلێمانى ئاماژه‌ى به‌وه‌ش دا، له‌شوێنى ئه‌نجامدانى كاره‌كه‌یان سه‌رجه‌م تۆمه‌تباره‌كان له‌لایه‌ن هێزه‌كانى پۆلیسه‌وه‌ ده‌ستگیر كراون و له‌سه‌ر بڕیارى دادوه‌ر و به‌پێى ماده‌ى 63ى یاساى شوێنه‌وار به‌ند كراون و لێكۆڵینه‌وه‌ له‌مباره‌یه‌وه‌ به‌رده‌وامه‌.












باسنيوز