بەپێی گرتەڤیدیۆیەک کە پێش خنکانی تۆمارکراوە، کەسێک بانگ لە عەبدولقادر، ئەو پێشمەرگەیەی دوێنێ لە زێی گەورەدا خنکا، دەکات و دەڵێت "لەوە زیاتر نەڕۆیت، باشە؟، ئەویش وەڵامدەداتەوە، ناڕۆم"، بەڵام بە یەکجاری رۆیشت و تاوەکو ئێستاش تەرمەکەی نەدۆزراوەتەوە.

عەبدولقادر سلێمان تەمەنی 56 ساڵە، پێشمەرگەیە و خەڵکی گوندی کەڵەکینی سەر بە شارۆچکەی کەسنەزانە، بەمەبەستی گەشت سەردانی چەند هاوڕێیەکی پێشمەرگەی کردووە لە گوندی چەمە، هاوڕێکانی دەڵێن "دوای دانیشتنێکی خۆش بە خواستی خۆی چووەتە ئاوەکەوە و مەلەی کردووە، بەڵام لە ناکاو دەستی بەرزکردووەتەوە و دیار نەماوە".

تاوەکو ئێستا تەرمی عەبدولقادر نەدۆزراوەتەوە، کەسوکار و هاوڕێکانی داوا لە حکومەتی هەرێمی کوردستان دەکەن هاوکارییان بکات بۆ دەرهێنان و دۆزینەوەی تەرمەکە.

بەپێی ئامارەکانی بەڕێوەبەرایەتی بەرگری شارستانی دهۆک ئەمساڵ 28 کەس لە سنووری پارێزگای دهۆک لە ئاودا خنکاون، تاوەکو ئێستا تەرمی سێ کەس نەبیندراونەتەوە و 22 کەسیش رزگارکراون.