بڕیاردەری لیژنەی یاسایی پەرلەمانی کوردستان ڕایگەیاند کە لیژنەکە ھەنگاوەکانی ھەموارکردنی پەیڕەوی ناوخۆی پەرلەمانی کوردستانی دەستپێکردووە.

جەلال محەمەد ئەمین بڕیاردەری لیژنەی یاسایی پەرلەمانی کوردستان راگەیاند: "پەیڕەوی ناوخۆی پەرلەمانی کوردستان کەموکوڕی تێدایە و پێوستە بەشێک لە ماددەکانی ھەموار بکرێتەوە".

گوتیشی: "بڕیارە ھەفتەی داھاتوو لیژنەی کاروباری یاسایی پەرلەمان کۆببێتەوە ئامادەکاری بکات بۆ ھەموارکردنەوەی پەیڕەوی ناوخۆی پەرلەمانی کوردستان".

ڕوونیشکردەوە کە دوای کۆبوونەوەکە، لیژنەکە دەست دەکەن بە ئامادەکردنی پێشنیازی یاسایەک و لە دوای ئامادەکردنی، پرۆژە یاساکە دەدرێتە دەستەی سەرۆکایەتی پەرلەمانی کوردستان.