نێچیرڤان بارزانی سوپاسی ئیمانوێل ماکرۆن دەکات لە پشتگیریکردنی هەرێمی کوردستان و دەڵێت، گەلی کوردستان رێز و پێزانینی بۆ دۆستایەتی و پشتگیری فەرەنسا هەیە و خوازیاری پەرەپێدانی زیاتری پەیوەندییەکانیەتی لەگەڵ پاریس.

سەرۆکی هەرێمی کوردستان لە دیدارێکدا لەگەڵ ئۆلیڤیێ دیکۆتینی، کۆنسوڵی گشتیی نوێی فەرەنسا لە هەولێر ئاماژەیکرد بە رۆڵی ئیمانوێل ماکرۆن، سەرۆکی فەرەنسا لە پشتگیریکردنی هەرێمی کوردستان و هەوڵەکانی بۆ دەستپێکردنەوەی دیالۆگی هەولێر- بەغدا کە لە ئەنجامدا هەردوولا توانییان هەنگاو بۆ ئاساییکردنەوەی پەیوەندییەکان و چارەسەرکردنی هەندێک لە کێشەکان بنێن.

نێچیرڤان بارزانی پشتگیری خۆی بۆ هەوڵەکانی فەرەنسا لە پێناو چارەسەرکردنی ناکۆکییەکانی نێوان لایەنە سیاسییە کوردییەکان لە رۆژئاوای کوردستان دەربڕی.

کۆنسوڵی گشتیی فەرەنساش لە هەولێر سوپاس و پێزانینی وڵاتەکەی بۆ هاوکاری و یارمەتییەکانی هەرێمی کوردستان بۆ ئاوارە و پەنابەران دووپاتکردەوە و هەروەها تیشکی خستەسەر سەردانی چاوەڕوانکراوی ئیمانوێل ماکرۆن بۆ عێراق و هەرێمی کوردستان.