لەسەر سکاڵای چەند هاووڵاتییەکی سنووری قەزای دوکان کەلەناو باخەکانیان دزیان لێکرابوو، مەفرەزەکانی بنکەی پۆلیسی سورداش بەهاوکاری ئاسایش و بنکەی پۆلیسی تەکیە توانیان 3 تۆمەتبار دەستگیربکەن کەلەناو باخەکانی هاوینەهەواری مێرگەپان دزیان لەباخەکان کردبوو.

پۆلیسی سلێمانی رایگه‌یاند، لەئێستادا تۆمەتباران بەفەرمانی دادوەر و بەپێی ماددەی 443 لەیاسای سزادان ڕاگیراون و لەکاتی دەستگیرکردنیشیاندا دەستگیراوە بەسەر 2 چەکی جۆری دەمانچە و تاپڕ.

پۆلیس له‌ راگه‌یه‌ندراوه‌كه‌دا، ئاماژه‌ به‌وه‌ش ده‌كات، دوای ئەوەی چەند خاوەن فرۆشگایەکی سەر ڕێگای هاوینە هەواری قەزای دوکان سکاڵایان لەبەشی پۆلیسی دوکان تۆمارکرد کەوا دزیان لێکراوە، هێزەکانی پۆلیس لێکۆڵینەوەیان دەستپێکرد و لەلایەن مەفرەزەکانی بنکەی پۆلیسی سوورداشەوە 2 تۆمەتبار دەستگیرکران و لەئێستادا هەردوو تۆمەتبارەکە بەبڕیاری بەڕێز دادوەرو بەپێی ماددەی 443 لەیاسای سزادان ڕاگیراون.

لەلایەن بنکەی پۆلیسی سورداشەوە پەڕاوی لێکۆڵینەوە بۆ تۆمەتباران کراوەتەوەو لێکۆڵینەوە لەگەڵیان بەردەوامە.