به‌رپرسی لقی 17ی پارتی دیموكراتی كوردستان له‌ شه‌نگال ئاماژه‌ به‌وه‌ ده‌كات کە دۆخی شاره‌كه‌ خراپه‌ پارتی كرێكارانی كوردستان (په‌كه‌كه‌) و حه‌شدی شه‌عبی له‌ شه‌نگال هۆكارن بۆ نه‌گه‌رانه‌وه‌ی ئاواره‌كان، و ده‌بێت هه‌ولێر و به‌غدا له‌باره‌ی دۆخی شاره‌كه‌وه‌ رێككه‌ون.

قادر قاچاغ، به‌رپرسی لقی 17ی پارتی دیموكراتی كوردستان له‌ شه‌نگال گوتی: "شه‌نگال له‌لایه‌ن حه‌شدی شەعبی و په‌كه‌كه‌وه‌ داگیركراوه‌ و بۆشایی ئه‌منی له‌شه‌نگال هه‌یه‌ و هیچ خزمه‌تگوزارییه‌ك له‌و شاره‌ نییه‌ و حه‌شد ده‌ستیان كردووه‌ به‌ بڵاو كردنه‌وه‌ی لۆگۆ و ئاڵای مه‌زهه‌بی شیعه‌ له‌ناو شه‌نگال و شوێنه‌ گشتییه‌كان له‌چه‌ند ناوچه‌یه‌كیش شاریش بڵاوه‌یان پێكراوه‌".

گوتیشی: "ده‌بێت له‌باره‌ی ره‌وشی ئه‌و شاره‌وه‌ هه‌رێم و به‌غدا رێككه‌ون و بەنیازیشین كه‌ له‌و باره‌وه‌ دۆخی شه‌نگال چاره‌سه‌ر بكرێت و خه‌ڵك بگه‌رێته‌وه‌ بۆ شاره‌كه‌".