بە پێی زانیارییەكان ئەمڕۆ سێشەممە ٣ی ٩ی ٢٠١٩ لە گەڕەكی "ئازادی" شاری كەركووك، بەهۆی شەڕی نێوان زاوا و خەزوورێك، لە نزیك مزگەوتی شەهیدان زاواكە چوار فیشەك بە (دلێر ئەكرەم)ی خەزووریەوە دەنێت و برینداری دەكات.

هەر بە گوێرەی زانیارییەكان کەلە تۆڕە کۆمەڵایەتییەکانی کەرکووک بڵاو کراەتەوە، "تاریق محەمەد"ی زاوا لە كاتی گەڕانەوەی بۆ ماڵەكەی لە گەڕەكی پەنجا عەلی، فیشەكێكی بەسەری خۆیەوە ناوە و بریندار بووە.

ئەوەش خراوەتە ڕوو تاریق محەمەد پێشمەرگەیە و خەزووریشی پیشەی پۆلیسە، هەردووكیان بە برینداری گەیەندراونەتە نەخۆشخانەی ئازادی لە شاری كەركووك و باری تەندروستییان ناجێگیرە.

دوای ڕووداوەکانی ١٦ی ئۆکتۆبەری ساڵی ٢٠١٧ و داگیرکردنی شاری کەرکووک لەلایەن میلیشیاکانی حەشدی شەعبی، دۆخی ئەمنیی ئەو پارێزگایە تێک چووە و حاڵەتەکانی توندوتیژی و دزی و ڕفاندن و هێرشکردنە سەر هاووڵاتیان ڕوویان لە زیادبوون کردووە و هێزە ئەمنییەکانیش توانای سەقامگیریی ئەمنییان نییە.












باسنيوز