حکومەتی هەرێمی کوردستان یارمەتی بەرپرسانی هەرێمی تایوان دەدات بۆ دەستگیرکردنی تۆمەتبارێکی عێراقی و دۆزینەوەی شوێنی منداڵەکەی.

کان یێن مین، بەڕێوەبەری "یەکەی کاروباری تاوانە نێودەوڵەتییەکان"ی هەرێمی تایوان رایگەیاند، تۆمەتبارەکە ناوی "عەلی حەمەد جومعە"یە و دوای ئەوەی تۆمەتی کوشتنی خەسوو و خەزوورە تایوانییەکەی دراوەتە پاڵ، لە فڕۆکەخانەی نێودەوڵەتیی هەولێر دەستگیرکراوە.

کان مین دەڵێت، شوێنی مانەوەی منداڵە تەمەن یەک ساڵەکەی عەلی و هاوژینە تایوانییەکەی دیار نەبوو و هەربۆیە بە یارمەتی پۆلیسی فیدراڵی ئوسترالیا پەیوەندییان بە حکومەتی هەرێمی کوردستانەوە کردووە تاوەکو لە دۆزینەوەی ئەو منداڵەدا یارمەتیان بدەن و لەو رێگەیەوە توانراوە ئەو کوڕە لە ماڵی خزمێکی عەلی لە موسڵ بدۆزنەوە.

بەڕێوەبەری "یەکەی کاروباری تاوانە نێودەوڵەتییەکان"ی هەرێمی تایوان گوتی، دواتر ئامادەکاری تەواوکرا و رۆژی 27ی ئابی 2019 منداڵەکەیان وەرگرتەوە.