لە کاتێکدا کەمتر لە سێ هەفتەی دیکە خوێندنی کوردی لە کەرکووک دەستپێدەکاتەوە کە تاوەکو ئێستا 70 قوتابخانە بەهۆی شەڕی داعش و رووداوەکانی دوای 16ی ئۆکتۆبەری 2017 خوێندن تێیاندا راگیراوە.

بەشێک لە قوتابیانی خوێندنی کوردی دەیانەوێ شوێنی خوێندنیان بۆ قوتابخانە عەرەبییەکان بگوازنەوە، بەرپرسانی خوێندنی کوردی ناڕازین لە کەمی بینای خوێندن، دامەزراندنی مامۆستا و شێوازی تاقیکردنەوەکان.

بەپێی ئامارەکان ئەمساڵ 98 هەزار قوتابی لە قوتابخانە کوردییەکانی کەرکووک دەخوێنن و روونیش نییە لەو دوو هەزار و 800 مامۆستایەی بۆ کەرکووک دادەمەزرێن، چەند مامۆستایان بۆ خوێندنی کوردی دەبێت.