ئەمڕۆ چوارشەممە ٢٨ی٨ی٢٠١٩ لایەنە سیاسییەکانی پارێزگای هەڵەبجە، لەسەر داوای نووسینگەی هەڵەبجەی پەرلەمانی کوردستان، لە مۆنۆمێنتی هەڵەبجە، سەبارەت بە پرسی پێکهێنانی ئەنجومەنی پارێزگای هەڵەبجە کۆ بوونەوە.

لە کۆبوونەوەکەدا کاوە عەلی، جێگری پارێزگاری هەڵەبجە، سەرچنار ئەحمەد، ئەندامی پەرلەمانی کوردستان و نوێنەری سەرجەم لایەنە سیاسییەکان لە هەڵەبجە و بەشێک لە پاڵێوراوانی حزبەکان بۆ ئەنجومەنی پارێزگای هەڵەبجە ئامادە بوون و تێیدا تیشکیان خستە سەر پرسی پێکهێنانی ئەنجومەنی پارێزگای هەڵەبجە.

سەرچنار ئەحمەد، ئەندامی پەرلەمانی کوردستان، لە کۆنگرەیەکی ڕۆژنامەنووسیدا ڕای گەیاند: "ئەمڕۆ سەرجەم لایەنە سیاسییەکانی پارێزگای هەڵەبجە و کۆ بووینەوە و سەبارەت بە دامەزراندنی ئەنجومەنی پارێزگای هەڵەبجە گفتوگۆمان کرد و بەرهەمدار بوو".

ڕوونیشی کردەوە: "سەرجەم لایەنە سیاسییەکان هاودەنگ بوون و ڕێک کەوتن کە ئامادەن ناوی کاندیدەکانیان هەتا کۆتایی هەفتەی داهاتوو بنێرن بۆ دیوانی پارێزگای هەڵەبجە و ئەوانیش بینێرن بۆ وەزارەتی ناوخۆ و دوا جاریش بۆ ئەنجومەنی وەزیران، ئەوکات بڕیاری دەرچوونی فەرمانیان بۆ دەردەچێت و ئەنجومەنیی پارێزگای هەڵەبجە دەست بەکار دەبێت، هەڵەبجەش وەک پارێزگانی دیکە دەبێتە خاوەنی ئەنجومەنی پارێزگا".

سەرچنار ئەحمەد گوتیشی: "له‌ كۆبوونه‌وه‌كه‌دا گرفتێكی به‌رچاو له‌ ئارادا نه‌بوو، ئێمه‌ بڕیاری ژماره‌ (104)ی 16ـی 3ـی 2017ی ئه‌نجومه‌نی وه‌زیرانمان هه‌یه‌، كه‌ تایبه‌ته‌ به‌ ته‌شكیلكردنی ئه‌نجومه‌نی پاریزگای هه‌ڵه‌بجه‌ و به‌ڕێوه‌به‌رایه‌تییه‌ گشتییه‌كان، ئه‌ویش به‌پێی پشکی حزبی و به‌پێی به‌ركه‌وته‌ی حزبی ده‌درێته‌ حزبه‌كان و ته‌مانای ئه‌وه‌ش ده‌كه‌ین له‌ ئاینده‌یه‌كی نزیكدا ئه‌نجومه‌نی پاریزگای هه‌ڵه‌بجه‌ و به‌ڕیوه‌به‌رایه‌تییه‌ی گشتییه‌كان ده‌ست بەكار بن".











باسنيوز