وەزارەتی ئەوقافی حكوومەتی ھەرێمی كوردستان، ئامادەكاری دەكات بۆ ئەوەی لە چوار ساڵی داھاتوو چەند گۆڕانكارییەك لە كاروباری مزگەوتەكانی كوردستان ئەنجامبدات بەتایبەت رێكخستنەوەی گوتاری ھەینی و كاتی گوتاری ھەینی، بەشێك لە مامۆستایانی ئایینیش بە گرنگی دەزانن كاروباری مزگەوتەكان رێكبخرێتەوە.

فەرەیدون غەریب، بەڕێوەبەری گشتی ئەوقافی سلێمانی راگەیاند: لە پلانی چوار ساڵی داھاتووی وەزارەتی ئەوقاف كار لەسەر ئەوە كراوە ھەموو كاروبارەكان رێكبخرێنەوە، وەك وتاری رۆژی ھەینی، كەمكردنەوەی گوتاری ئایینی كە پێویست نییە، ھەروەھا رێكخستنەوەی موڵكەكانی ئەوقاف و ئەنجامدانی پڕۆژە، ھەروەھا نەھێشتنی رۆتین".

گوتیشی: "ھەوڵدەدەین لەم چوار ساڵەدا زیاتر بابەتی ئارامی و ئاشتی و لێبوردەیی لە وتارەكانی رۆژی ھەینی گەشەی پێبدەین".

بڕیارە وەزارەتی ئەوقافی حكوومەتی ھەرێمی كوردستان، بۆ چوار ساڵی داھاتوو چەند گۆڕانكارییەك لە كار و پلانەكانیدا بكات، بە تایبەت رێكخستنەوەی گوتاری رۆژانی ھەینی. بەڕێوەبەری گشتی ئەوقافی سلێمانی ئەنجامدانی گۆڕانكاریی و جێبەجێكردنی چەند پڕۆژەیەك لەلایەن وەزارەتی ئەوقاف بەپێویست و گرنگ دەزانێت.

مامۆستایانی ئایینی بە گرنگی دەزانن وەزارەتی ئەوقاف زیاتر كار لەسەر رێكخستنەوەی كات و گوتارەكانی رۆژی ھەینی لە مزگەوتەكان بكات و لە ھەر پارێزگایەك رۆژانی ھەینی یەك وتارھەبێت و تایبەت بكرێت بە پرس و بابەتێكی گرنگ.

وەزارەتی ئەوقافی حكوومەتی ھەرێمی كوردستان، لە بەرنامەیدایە لە چەند مانگی داھاتوودا كۆنفرانسێك بۆ مامۆستایانی ئایینی ئەنجامبدات و لە كۆنفرانسەكەدا پلان و میكانزمی چۆنییەتی رێكخستنەوەی كاروباری سەرجەم مزگەوتەكان لە ھەرێمی كوردستان بخاتەڕوو.







K24