پشکنەری گشتیی وەزارەتی ناوخۆی عێراق ئاشکرای کرد، ٢٤ ژنی بیانی دەستگیر کراون کە لە هۆڵەکانی قومار لە شاری بەغدای پایتەختی عێراقدا کاریان کردووە.

جەمال ئەسەدی، پشکنەری گشتیی وەزارەتی ناوخۆی عێراق لە لێدوانێکیدا بۆ میدیاکان ئاماژەی بەوە داوە، ئەو ٢٤ ئافرەتەی دەستگیر کراون، خەڵکی وڵاتانی جیاجیان و ژمارەیەک پیاوی بیانیش دەستگیر کراون.

ڕوونیشی کردووەتەوە کە ئەو کەسانە هۆڵەکانی قوماری “ڕۆڵێت” کاریان کردووە و بەڕێوەیان بردووە.

بە گوتەی ئەسەدی، سەرجەم دەستگیرکراوان بەپێی یاساکانی عێراق و لە دوای کۆتاییهاتنی لێکۆڵینەوەکان لەگەڵیاندا، دادگایی دەکرێت.

جێی باسە دەزگا ئەمنییەکانی عێراق لە بەغدا هەڵمەتێکی بەرفراوانیان بۆ داخستنی هۆڵەکانی قومار و ڕۆڵێت دەست پێ کردووە و تاوەکوو ئێستا دەیان کەسیان بەهۆی ئەم کارانەوە دەستگیر کردووە.











باسنيوز