ئەندامێکی ئەنجومەنی پارێزگای سلێمانی ئاشکرای کرد دروستکردنی شەقامە١٠٠ مەترییەکەی سلێمانی لە کۆمپانیای تایبەمەند سەندراوەتەوە و بڕیارە کۆمپانیایەکی ناوخۆیی بە قەرز دروستی بكات.

ڕەمەزان نامیق، ئەندامی ئەنجومەنی پارێزگای سلێمانی ڕايگەیاند: "پڕۆژەی دروستکردنی شەقامی ١٠٠ مەتریی سلێمانی لەسێ کۆمپانیا تورکیەکە وەرگیراوەتەوە و دراوە بە کۆمپانیایەکی ناوخۆیی.

گوتیشی: "ھۆکاری لێسەندنەوەی پڕۆژەکە بە بیانووی ئەوە بووە کە حکوومەت بودجەی پێویستی نییە بۆ تەواوکردنی پڕۆژەکە و بڕیار وایە کۆمپانیا ناوخۆییەکە بە قەرز پڕۆژەکە دروست بکات کە بڕی بودجەکەی (٤٦۹) ملیار دینارە".

ڕوونیشی کردەوە: "بەپێی ڕێککەوتنەکە شەقامە ١٠٠ مەترییەکە بە ھەمان کوالێتی و پێداویستییەکانی دیزاینی کۆمپانیا تورکییەکە دروست دەکرێت".

ئەو ئەندامەی ئەنجومەنی پارێزگای سلێمانی باسی لەوەش کرد ئێستا ھەموو ڕێکارە یاسایی و ئیدارییەکان تەواو بوون و تەنھا ڕەزامەندیی وەزارەتی شارەوانی ماوە بۆ ئەوەی بکەوێتە بواری جێبەجێکردنەوە.











باسنيوز