بڕیاردەری لیژنەی دارایی لە پەرلەمانی عێراق گوتی، لیژنە تەكنیكییەكانی نێوان هەرێم و بەغدا لەبارەی كێشەكانی نێوان هەردوولا دەست بە گفتۆگۆ دەكەن و پێویستە پەلە بكرێت و پێش مانگی 10 لەبارەی پشكی هەرێم لە بودجەدا بگەنە رێككەوتن. دەشڵێ، باشتر وایە هەرێم و بەغدا رێككەوتنێكی چوار ساڵی سەبارەت بە پڕۆژەیاسای بودجە واژۆ بكەن.

د. ئەحمەد سەفار، رایگەیاند، ناردنی مووچەی فەرمانبەران لە لایەن حكوومەتی عێراقەوە هیچ كێشەیەكی نییە و بەردەوام دەبێت لە رەوانەكردنی، بۆ ئەم مانگەش هەموو رێكارەكانی ناردنی تەواو بووە و رەوانە دەكرێت و هیچ گرفتێك دروست نابێت.

سەفار گوتیشی، لە مانگی پێنجەوە ئامادەكاری بۆ بودجەی ساڵی داهاتوو دەستی پێكردووە و لە ئێستادا ماوە پشكی هەرێمی كوردستان یەكلا بكرێتەوە، كە بڕیارە لیژنە تەكنیكییەكانی نێوان هەرێم و بەغدا دەست بە گفتوگۆ بكەن، بۆ ئەوەی بتوانن پێش مانگی 10 پشكی هەرێم یەكلا بكەنەوە، بۆیە كات كەم ماوە و پێویستە پەلە بكرێت.

ناوبراو باسی لەوەش كرد، گرنگە كە هەردوو حكوومەت لەبارەی پڕۆژەیاسای بودجەوە رێككەوتنێكی چوار ساڵی واژۆ بكەن، بۆ ئەوەی ساڵانە ئەو كێشانە دووبارە نەبنەوە، بەڵام سەرەتا پێویستە پشكی هەرێم لە پڕۆژەیاسای بودجەی گشتیی عێراق بۆ ساڵی داهاتوو یەكلا بكرێتەوە.


kdp-