مالا ئێزدیان بۆ چاڤدێریكرنا زارۆیێن ئێتیم و سێوی و زارۆیێن قوربانیێن داعشێ‌ ل كۆمەلگەها شاریا سەر ب قەزا دهۆكێ‌ ڤە دهێتە ڤەكرن و بۆ قۆناغا ئێكێ‌ 20 زارۆیان وەردگرن.

كاوە عیدو خەتاری، بەرپرسێ‌ مالا جڤین و سەرۆكێ‌ رێكخراوا جڤین یا كوردێن ئێزدی دیار كر، ب پشتەڤانیا كەساتیەكێ‌ ئێزدێ‌ مالا جڤین ل كۆمەلگەها شاریا دهێتە ڤەكرن و ل گۆرەی هندەك مەرجا زارۆیێن بووینە قوربانیێن رێكخراوا تیرۆری یا داعشێ‌ و زارۆیێن دایك و بابێن وان هاتینە شەهیدكرن و رەڤاندن و ئێتیم و سێوی ماین، دێ‌ د ڤێ‌ مالێ‌ دا هێنە ب خودانكرن.

ئاشكرا ژی كر كو نها 20 زارۆ ژ كەمپێن ئاوارەیان هاتینە وەرگرتن و ژیانا خوە د ڤێ‌ مالێ‌ دا دبەنە سەر و ئەڤە وەكو قوناغا ئێكێ‌ و ل نێزیك دێ‌ هندەك زارۆیێن دی ژی ل گۆرەی رێنمایان هێنە وەرگرتن.

خویاژی كر، د ڤێ‌ مالێ‌ دا رۆژانە دێ‌ چالاكیێن جۆراوجۆر هێنە ئەنجامدان ژ بۆ هندێ‌ زارۆ ئەو ژیانا نەخۆش یا بێ خودانیێ‌ و دەردەسەریێن داعشێ‌ ژبیر بكەن.










باسنيوز