قایمقامی شارۆچکەی فەللوجە لە پارێزگای ئەنبار، دوای پەلاماردانی گەنجێکی کورد لە شارۆچکەکەی، پەیامێک بۆ خەڵکی هەرێمی کوردستان دەنێرێت.

ئەمڕۆ شەممە 17-8-2019، عیسا سایر، قایمقامی فەللوجە لە پەیامێکدا، رایگەیاندووە، ئەوانەی لەو گەنجە کوردەیان دا، “کەسانی سەرخۆش بوون”.

عیسا سایر داوای لێبووردن لە خەڵکی هەرێمی کوردستان دەکات و رایگەیاندووە، لێدان لەو گەنجە کوردە ”هەڵسوکەوتی خەڵکی فەللوجە نییە“.

قایمقامی فەللوجە بە ستایشکردنەوە ئاماژەی بە لەخۆگرتنی هەزاران کەسی خەڵکی فەللوجە لە هەرێمی کوردستان و بە تایبەت هەولێر کردووە، کە ئەو عەرەبانەی فەللوجە لە ترسی میلیشیا تائیفییەکان پەنایان بۆ کوردستان هێناوە.

عیسا سایر بەڵێنی لێپێچینەوە و دادگاییکردنی ئەو کەسانەی دا کە پەلاماری گەنجە کوردەکەیان داوە و جەختی لەوە کردووەتەوە، کە ئەو هەڵسوکەوتە لەگەڵ ئەخلاقی فەللوجەییەکان یەک ناگرێتەوە.

هونەر کە گەنجێکی خەڵکی هەولێرە و ئێستا لە فەلووجە چێشتخانەی هەیە، ڕايگەیاند کە یەکێک لەو کەسانەی پەلاماریان داوە، ئەفسەری حەشدی شەعبییە بە پلەی نەقیب و بەهۆی جلی کوردییەوە پەلاماری داوە.

ئەوەشی ئاشکرا کرد کە ئەو لە منداڵییەوە هەر جلی کوردی لەبەر کردووە و حەز ناکات جلی دیکە بپۆشێت، بەڵام پەلاماردەرەکان پێیانگوتووە کە جلی کوردی قەدەغەیە.











باسنيوز