گوتەبێژی بەڕێوەبەرایەتیی هاتوچۆی هەولێر ڕای دەگەیەنێت، لە بەشی مۆڵەتی بەڕێوەبەرایەتیی هاتوچۆی هەولیر کار لەسەر دروستکردنی گۆڕەپانێکی نوێ دەکرێت و گۆڕەپانە کۆنەکەش نۆژەن دەکرێتەوە.

دوای ئەوەی ژمارەیەکی زۆر لەو هاووڵاتییانەی بۆ نوێکردنەوە و دەرهێنانی مۆڵەتی شۆفێری سەردانی بەڕێوەبەرایەتیی هاتوچۆی هەولێر بەشی دەرهێنانی مۆڵەتی شۆفێرییان کرد گلە و گازندەی ئەوەیان کردووە لەو بەشەدا شوێنی حەوانەوە و دەستشۆر و خزمەتگوزایی تێدا نییە دەبێ لەبەر خۆر بوەستن تا نۆرەیان دێت.

لەو بارەیەوە ڕائید فازڵ حاجی، گوتەبێژی بەڕێوەبەرایەتیی هاتوچۆی هەولێر ڕاگەیاند: "ڕاستە لە گۆڕەپانە کۆنەکەدا نە دەستتشۆر و نە کەپری لێ نییە و ناشتوانین دروستی بکەین و نۆژەنی بکەینەوە، چونکە کارەکان دەوەستن".

گوتەبێژی بەڕێوەبەرایەتیی هاتوچۆی هەولێر گوتیشی: "ئێستا خەریکی دروستکردن گۆڕەپانێکی نوێین بۆ ئەو بەشە و کارەکانیشی لە کۆتایی ساڵی ۲۰۱۹دا تەواو دەبێت و دوای تەواوبوونی گۆڕەپانە نوێیەکە، دەست بە نۆژەنکردنەوەی گۆڕەپانە کۆنەکەش دەکرێت و ئەو شتانەی پێویستن تێیدا دروست دەکرێن".

بەشی مۆڵەتی هاوتچۆی هەولێر یەک لەو دامودەزگایانە کە ڕۆژانە بە سەدان هاووڵاتی بۆ دەرهێنانی مۆڵەتی شۆفێری و ڕاییکردنی کارەکانیان سەردانی دەکەن و نەبوونی خزمەتگوزاری و گەرمبوونی شوێنەکە گلە و گازاندەی زۆری هاووڵاتیانی لێ کەوتووەتەوە.











باسنيوز