بەڕێوەبەریی سووتەمەنیی هەولێر رایگەیاند، ئەوان وەكو بەڕێوەبەرایەتیی سووتەمەنیی هەولێر، هەر بڕە سووتەمەنییەكیان بەدەست گەیشتبێت، بەسەر هاووڵاتیاندا دابەشیان كردووە، بۆ ئەو مەبەستەش هەموو بەڵگەكان بەردەستن.

دەنگۆی ئەوە بڵاو كراوەتەوە، كە گوایە لە شاری هەولێر 30 ملیۆن لیتر نەوتی سپی دیار نییە و نازانرێت چی لێ هاتووە، لە بەرامبەردا ئاری كاكەشین، بەڕێوەبەری سووتەمەنیی هەولێر، گوتی: "ئێمە وەكو بەڕێوەبەرایەتیی سووتەمەنیی هەولێر، هەر بڕێك نەوتمان لە ساڵی ڕابردووەوە تا ئێستا بەدەست گەیشتبێت، راستەوخۆ بەسەر هاووڵاتیاندا دابەشمان كردووە".

كاكەشین گوتیشی: "بۆ دابەشكردنی هەر بڕێك نەوت، هەموو بەڵگەكان لای ئێمە بەردەستن و هەمووی ڕوون وئاشكرایە، بۆیە بە هیچ شێوەیەك هیچ بڕە نەوتێك لای ئێمە ون نەبووە".

ناوبراو باسی لەوەش كرد: "بۆ ئەوەی زۆرترین خەڵك لە وەرگرتنی نەوتی سپی سوودمەند بێت، ئەوەی لە بەغداوە بەدەست ئێمە گەیشتبێت، نەمانداوە بە فەرمانگە حكوومییەكان، بەڵكوو داومانە بە هاووڵاتیان".

kdp-