بەڕێوەبەری گشتیی دیوان لە وەزارەتی ناوخۆی حکوومەتی هەرێمی کوردستان، ئاشکرای دەکات ١٥ هەزار ئۆتۆمبێلی حکوومیمان هەیە و لە هەر سێ بەڕێوەبەرایەتیی هاتوچۆ لە پارێزگاکان بەردەوام کار لەسەر دانانی لۆگۆکان دەکرێت.

سامی جەلال، بەڕێوەبەری گشتیی دیوان لە وەزارەتی ناوخۆ، لەمبارەوە ڕايگەیاند: "ڕێکەوتی۱/۱۰/۲۰۱۹ کۆتایی بە پرۆسەی دانانی لۆگۆ بۆ ئۆتومبێلە حکوومییەکان دێت و دوای ئەو کاتەوە لێپرسینەوە دەست پێ دەکات و هەر ئۆتۆمبێلێک لۆگۆی لێ نەدرابێت، ئەوا خەرجی و بەنزینی ڕادەگیرێت".

ئەوەشی خستە ڕوو: "بڕیارەکە پێش دوو مانگ دراوە، واتە مانگی حوزەیران دراوە و تشرینی یەکەم کۆتایی دێت".

پێشتر لەلایەن بەرپرسان و فەرمانبەرانی دامودەزگا حکوومییەکانەوە سەدان ئۆتۆمبێلی حکوومی لە دوای دەوامی ئاسایی بەکار دەهێنران و خەرجییەکانیشی دەخرایە ئەستۆی حکوومەت و چەندین حاڵەتی سەرپێچیش ڕووی داوە، بەڵام بە جێبەجێکردنی بڕیارەکەی وەزارەتی ناوخۆ ڕێگری لە بەکارهێنانی ئۆتۆمبێلی حکوومی لە دوای دەوامی ئاسایی دەکرێت و هەر ئۆتۆمبێلێکی حکوومیش بەدەر لەو بڕیارە کاری پێ بکرێت لێپێچینەوە لەگەڵ ئەو کەسە دەکرێ کە بەکاری هێناوە.










باسنيوز