ئەمڕۆ پەرلەمانی عێراق كۆ دەبێتەوە و یەكێك لە خاڵەكانی كارنامەی كۆبوونەوەكەیش، گفتوگۆكردنە لەبارەی پێكھێنانی لیژنە ھەمیشەییەكانەوە. پەرلەمانتارێكی پارتییش دەڵێ، ھەوڵ دەدەن ئەو لیژنانە وەربگرن كە بتوانن لە رێگەیانەوە خزمەتی خەڵكی كوردستانی پێ بكەن.

سەبارەت بە كۆبوونەوەی ئەمڕۆی پەرلەمانی عێراق، محەممەد ئەمین، پەرلەمانتاری پارتی، بە ماڵپەڕی فەرمیی پارتی دیموكراتی كوردستانی ڕاگەیاند: "لە كۆبوونەوەی ئەمڕۆدا باس لە پێكھێنانی لیژنە ھەمیشەییەكانی پەرلەمان دەكرێت و لیژنەكانیش سەرۆكایەتییەكەیان بەپێی خاڵ و ژمارەی كورسیی فڕاكسیۆنەكان دەبێت، ئێمەش وەكو فڕاكسیۆنی پارتی سەرۆكایەتیی چەند لیژنەیەكمان بەردەكەوێت، كە لەنێویاندا لیژنەی سیادی و لیژنەی خزمەتگوزاری ھەیە".

ئەمین گوتیشی: "ھەوڵ دەدەین لە لیژنە سیادییەكان ئەو لیژنانە وەرگرین كە پەیوەندییان زیاتر بە ھەرێمی كوردستانەوە ھەیە، كە گرینگترینیان لیژنەكانی دارایی و نەوت و غازن و، لە لیژنە خزمەتگوزارییەكانیش لیژنەی تەندروستی و ئاوەدانكردنەوەن، بەڵام یەكلاكردنەوەی لیژنەكان پێویستی بە رێككەوتنی فڕاكسیۆنەكان ھەیە".
kdp-