فیلیپ ئەكێرمان شارەزای كاروباری رۆژهەڵاتی ناوەڕاست گوتی: من بەو پرسیارە وەڵام دەدەمەوە كە ئایا پێتانوانییە رێككەوتنی حكومەتی ئەمریكا لەگەڵ ئێران كاریگەری دەبێت؟ لەهەمانكاتدا ئۆپێك كۆنتڕۆڵی بەرهەمەكانی دەكات، بۆیە لەو باوەڕەدا نیم كە نرخی نەوت بەردەوام بێت لەدابەزین، بەڵام نازانم تاچەند بەردەوام دەبێت و نیگەرانییەك هەیە لە ئەمریكا كە نرخی نەوت جارێكی دیكە بەرز دەبێتەوە، هەرلەبەر ئەمەشە یەدەكی فیدڕاڵیمان لە حاڵەتی نیگەرانیدایە و لەوانەیە لە ماوەی شەش مانگی داهاتوودا هەوڵبدات رێژەی سوود رێكبخات بۆ ئەوەی سنوورێك بۆ نرخەكان دابنێت، بەڵام نازانم چەند دەخایەنێت و نازانم تاچەند خۆشگوزەرانی دانیشتووانی كورد ئەولەوییاتی حكومەتی ئێران، یان حكومەتی ئەمریكایە، یان هی ئۆپێكە، بەداخەوە نازانم تا كەی ئەمە بەردەوام دەبێت.

فیلیپ ئەكێرمان هەروەها گوتی: دووبارە پێموایە ئێران وڵاتێكی سەرەكی بەرهەمهێنەری نەوتە و بە تێڕوانینی من زۆر شت روودەدات لەبەر رێككەوتنی لەگەڵ ئەمریكادا و خستنەڕووی زیاتر لە بازاڕدا درووست دەكات، هەروەها دەزانین كە زۆرجار نرخەكان بەشێكی لەلایەن ئۆپێكەوە رێكدەخرێت.



شايانى باسه ئەكێرمان هەروەها گوتی: ئەم جۆرە هەلومەرجە هەروەك ئەوەی جارانی پێشوو وایە، ئەمریكا لە قەیرانی دارایی گەورە دەرچووە، هەروەها سەرجەم جیهانیش لە قەیرانی دارایی گەورە دەرچوون، لە ئێستادا وەك جاران جۆرێك لە نادڵنیایی هەیە لە چین، بۆیە نازانم چی لەمەوە سەرهەڵدەدات، بەڵام نادڵنیایی زیاتر دێتەئاراوە، یان مەسەلەكە ئەوەیە هۆكارێكی سیاسی هەیە وا دەكات نرخی نەوت نزم بێتەوە و پێموایە حكومەتی ئێستای ئەمریكا تا رادەیەك خۆشحاڵە بە دابەزینی نرخی نەوت و پێموانییە كەنەدییەكان بەمە خۆشحاڵ بن لەبەر ئەوەی ئابوورییان وەك ئابووری ئێوە زۆر گرێدراوە بە بەرهەمی نیشتمانییانەوە و ئەوەی لە كەنەدییەكانەوە گوێم لێبووە ئەوانیش هاوردەیان زیادی كردووە و هەناردەیان كەمی كردووە و داهاتیان بە شێوەیەكی بەرچاو كەمی كردووە، نرخی نەوت تاهەتایە بەم شێوەیە نزم نابێت، لەوانەیە دوای هەڵبژاردنەكانی سەرۆكایەتی ئەمریكا بەرزببێتەوە.

لە درێژەی قسەكانیدا فیلیپ گوتی: دڵنیا نیم حكومەتی ئەمریكا ویستی ئەوەی هەبێت بەرەنگاری داعش بێتەوە لەسەر زەمین، لە هەمانكاتدا داعش چەندین ناوچەی گرنگی لەدەستداوە، ئەمەش هەڕەشەی تیرۆریزم لەسەر جیهان كەم ناكاتەوە، واتە بە شێوەیەك كە ئەو رێكخراوەی لە ئێستادا هەیە پێویستی بە جۆرێك لە ناوچە هەیە بۆ راهێنان، بەڵام لە شوێنێكی دیاریكراودا نا، واتە هەرچەندە رەققە گرنگییەكی مێژوویی هەیە، بەڵام داعش خۆی بەوەوە نابەستێتەوە بۆ كارەكانی، لەبەر ئەوەی پێش دامەزراندنی داعش، خانەی تیرۆریستی لە جیهاندا هەبوون، بۆیە لەلایەكەوە باسی ناكۆكییەكی ناوچەیی دەكەیت كە ئەمریكا بەڕاستی ویستی ئەوەی نییە كە زیاتر لەسەری بڕوات، بەڵام باسی تیرۆریزمێكیش دەكەیت كە بەڕاستی پێویستی بەوە نییە بۆ ئەوەی بەردەوام بێت لەوەی كە هەوڵدەدات بیكات، واتە كاتێك هێزە ناوچەییەكان لە عێراق سەركەوتنیان دژی داعش بەدەستهێناوە، پێموانییە ئەمە جیهان بێنێت بۆ شەڕكردن لەگەڵ داعش لەسەر زەمین، پێموایە هێرشە ئاسمانییەكان بەردەوام بن و هەوڵدەدرێت كار لەگەڵ هێزە ناوچەییەكان بكرێت بۆ چارەسەركردنی داعش، ئەمەش سەركەوتوو بووە، ئەمە جیاوازە لەوەی بڵێیت ناتۆ، یان نەتەوە یەكگرتووەكان دێن، یان ئەمریكا و بەریتانیا دێن و لەسەر زەمین بە شێوەیەكی سیستەماتیكی داعش تێكدەشكێنن، پێموانییە ئەمە رووبدات.


لە كۆتایی قسەكانیدا فیلیپ گوتی: ناسەقامگیرییەكی زۆر هەیە لەناوچەكەدا و ناسەقامگیرییەكە بەگشتی پێوەندی بە نرخی نەوتەوە نییە، بەڵام دابەزینی نرخی نەوت مەترسی خستۆتە سەر بارودۆخی مرۆیی، لەبەر ئەوەی هەستی نادڵنیایی خراپتر كردووە، گەرچی لەو باوەڕەدا نیم جۆرێك لە شۆڕش درووست بێت لە باكووری ئەفریقا بەهۆی نزمی نرخی نەوتەوە، سەبارەت بە كوردستانیش لە ئێستادا بزووتنەوەی سەربەخۆیی كورد لە رووی مرۆییەوە دەبیندرێت و ئەم هەنگاوە پێش دابەزینی نرخی نەوتیش هەر هەبووە.


بۆ خوێندنەوەی ئەم بابەتە لە گۆڤاری گوڵان ژمارە(1065)