وڵاتانی ئەندام لە هاوپەیمانێتی نێودەوڵەتی دژ بە رێکخراوی توندڕەوی داعش مەشق بە زیاتر لە 21 هەزار پێشمەرگە و سەربازی عێراقی دەکەن.



لە روونکردنەوەیەکدا، کە وێنەیەکی گەیشتووەتە باسنیوز، نووسینگەی راگەیاندنی باڵیۆزخانەی ئەمریکا لە عێراق رایدەگەیەنێت، کە راوێژکارانی سەربازیی حەوت وڵات (ئەڵمانیا، بەریتانیا، فینلەندا، هۆڵەندا، ئیتاڵیا، هەنگاریا و نەرویج) مەشق بە هێزەکانی پێشمەرگەی کوردستان دەکەن.



هەروەک لە روونکردنەوەکەدا هاتووە، 14 وڵاتیش لە سەربازگە عێراقییەکان مەشق بە هێزە عێراقییەکان دەکەن.



تاوەکو ئێستا 18 هەزار و 589 پێشمەرگە و سەربازی عێراقی مەشقیان تەواوکردووە و ئێستاش دوو هەزار 959 پێشمەرگە و سەرباز لەژێر مەشقدان.



لەسەرەتای هێرشی داعش بۆ سەر کوردستانی باشوور لە ساڵی 2014، ژمارەیەک وڵاتی هاوپەیمانیی نێودەوڵەتی بە مەشقکردن و ناردنی چەک و جبەخانە، هاوکاریی هێزی پێشمەرگەی کوردستانیان کردووە.




باسنیوز