کونسوڵی گشتیی ئەمریکا لە هەرێمی کوردستان رایدگەیەنێت، کە وڵاتەکەی ئامادەیە هاوکاریی هێزەکانی پێشمەرگەی کوردستان بکات.



بەپێی هەواڵێکی ماڵپەڕی فەرمیی پارتی دیموکراتی کوردستان، ”ھێمن ھەورامی“، بەرپرسی پەیوەندییەکانی دەرەوەی پارتی، لە کۆبوونەوەی لەگەڵ ”ماتیەس میتمان“، کونسوڵی گشتیی ئەمریکا، پرسی ریفراندۆم و چارەنووسی پەیوەندییەکانی هەرێمی کوردستان و عێراقی تاوتوێ کردووە.



هێمن هەورامی و ماتیەس میتمان گفتوگۆیان لەبارەی رەوشی سیاسیی ناوخۆی هەرێمی کوردستان، دوایین پێشهاتەکانی عێراق و شەڕی دژی رێکخراوی توندڕەوی داعش کردووە.



کونسوڵی گشتیی ئەمریکا لە هەرێمی کوردستان ئاماژەی بە ”هەموو ئامادەکارییەک“ی وڵاتەکەی بۆ پێشخستنی ڕەوشی سیاسیی ھەرێمی کوردستان و هاوکاریکردنی پێشمەرگە کردووە و راگەیاندووە، ”ھاوکاریکردنی پێشمەرگە مانای پاراستنی ئازادییەکانە لە جیھانی ئازادا“.






باسنیوز