د. دیندار زێباری سەرۆکی لێژنەی هەڵسەنگاندن و وەڵامدانەوەی ڕاپۆرتە نێودەوڵەتییەکان لە حکوومەتی هەرێم، بوونی پەیوەندییەکی بەهێز لە وەرگرتنی زانیاری نێوان حکوومەتی هەرێم و ئاژانسەکانی یوئێن و ڕێکخراوە نێودەوڵەتییەکانی بە گرنگ زانی بۆ پەرەپێدانی زیاتری پرەنسیپەکانی مافی مروڤ، کە هەرێمی کوردستان پابەندە بەو پرەنسیپانەوە، بە تایبەتی کە ئێستا هەرێم ڕووبەرووی شەڕێکی نەخوازراو بووەتەوە لەگەڵ تیرۆریستانی داعشدا.


لە دیدارێکی نێوان سەرۆکی لێژنەی هەڵسەنگاندن و وەڵامدانەوەی ڕاپۆرتە نێودەوڵەتییەکان و بەرپرسی ئۆفیسی مافی مروڤی نێردەی نەتەوەیەکگرتوەکان بۆ عێڕاق لە هەولێر خاتوو (ڕوەیدا ئەلحاج) جەختیان لەسەر ئەوە کردەوە کە پێویستە هەماهەنگییەکی زیاتر لەنێوان نێردەی یوئێن و لێژنەی هەڵسەنگاندن و وەڵامدانەوەی ڕاپۆرتە نێودەوڵەتییەکان هەبێت بۆ بەرەوپێشبردن و باشترکردنی کارەکان لەم بارەیەوە زێباری تیشکی خستە سەر میکانیزمی چۆنیەتیی کارکردنی لێژنەی هەڵسەنگاندن و وەڵامدانەوەی ڕاپۆرتە نێودەوڵەتییەکان لەسەر بابەتە جیاجیاکانی پەیوەست به ڕەوشی مافی مرۆڤ لە هەرێمی کوردستان کە ئەم لیژنەیە خاڵی پەیوەندیی حکومییە بۆ بەدواداچوون و هەڵسەنگاندنی پێشێلکاریەکان و دۆزینەوەی چارەسەر بۆیان.

لە لایەکی دیکەوە داوای لە نێردەی یوئێن کرد کە ئەم جۆرە کۆبوونەوانە بەردەوام بێت بۆ قووڵترکردنەوەی پەیوەندییەکانی نێوان حکوومەتی هەرێمی کوردستان و ئاژانسەکانی یوئێن و کۆمەڵگای نێودەوڵەتی بە مەبەستی خزمەتکردنی زیاتری بنەماکانی مافی مرۆڤ لە هەرێمی کوردستاندا.

لەلای خۆیەوە خاتوو (ڕوەیدا ئەلحاج) بەهەمان شێوە میکانیزمی کارکردنی ئۆفیسی مافی مروفی نێردەی نەتەوە یەکگرتوەکان بۆ عێراق و چۆنیەتیی کارکردنیان لە کوردستان شی کردەوە و تیشکی خستە سەر دروستکردنی بۆردێکی تایبەت بە چاودێری کردنی ڕاگیراوان لە گرتووخانەکانی هەرێمی کوردستان.

سەرۆکی لێژنەی هەڵسەنگاندن و وەڵامدانەوەی ڕاپۆرتە نێودەوڵەتییەکان جەختی کردەوە کە پێویستە ئەندامان و ستافی حكوومی خولی تایبەتی ڕاهێنانیان بۆ بکرێتەوە لەسەر چۆنێتی مامەڵەکردن لەگەڵ بابەتە جیاجیاکانی مافی مرۆڤ و چۆنیەتیی وەڵامدانەوەی ئەو ڕاپۆرتانەی کە تایبەتن بە ڕەوشی مافی مرۆڤ لە هەرێمی کوردستان، بۆ ئەوەی بتوانن ڕووداوەکان وەکو خۆیان بۆ کۆمەڵگای نێودەوڵەتی بگوازنەوە و کۆمەڵگای نێودەوڵەتیش وێنەیەکی دروستیان دەربارەی واقعی هەرێمی کوردستان هەبێت.