بەتۆمەتی تەشهیركردن بە ریچارد چارنێسكی، جێگری سەرۆكی پەرلەمانی یەكێتی ئەوروپا، پەرلەمانی كوردستان سكاڵای یاسایی لەدژی پەرلەمانتار عەلی حەمە ساڵح دایە سەرۆكی داواكاری گشتی.

لە نووسراوێکی فەرمیدا کە لە 18-1-2016 ی پەرلەمانی كوردستان بە واژۆی جەعفەر ئیبراهیم، جێگری سەرۆكی پەرلەمانی كوردستانی، ئاراستەی سەرۆكایەتی داواكاری گشتی‌ و دەستەی مافی گشتی كراوە، بەپێی ماددەی 2 لەبڕگەی یەكەم لە یاسای داواكاری گشتی ژمارە 159 لەساڵی 1979، سكاڵای یاسایی لەدژی پەرلەمانتاری فراكسیۆنی گۆڕان، عەلی حەمە ساڵح تۆمار كراوە.

هۆكارەكەشی وەك لە نووسراوەكەدا هاتووە ئەوەیە: "عەلی حەمە ساڵح لەلاپەڕەی تایبەتی خۆی لەفەیسبووك تەشهیری بە (ریچارد چارنێسكی) جێگری سەرۆكی پەرلەمانی یەكێتی ئەوروپا كردووە".

(ریچارد چارنێسكی) لەسەر داوای پەرلەمانی كوردستان لە 3-1-2016 سەردانی پەرلەمانی كوردستانی كردبوو و عەلی حەمە ساڵح لە پەیجی تایبەتی خۆی لە تۆڕی کۆمەڵایەتی فەیسبووک لەسەر ئەو سەردانە نووسیبووی:"هەمو دامو دەزگاكانی ئەووروپا لە 24.12.2015 تا04.01.2016 لەپشووی رەسمیدان بەهیچ شێوەیەك كاری رەسمی و فەرمییان نیە سەردانی پێنجەم جێگری سەرۆكی پەرلەمانی ئەورووپا كە بەڕێزێكی پۆڵۆنیە جێگای سەیرە بەرۆژی یەكشەممە و پشووی سەری ساڵ ئەم سەردانەی ئەنجام داوە، لەكاتی پشوی خۆی بووە تایبەت بووە بگرە لەپێناو چەند ملیۆن دۆلارێكدا ئەنجامی داوەو هیچی تر".















رووداو