ئەمڕۆ نوێنەری کوردانی ئێزدی لە پەرلەمانی کوردستان و سەرۆکی بنگەی لالش، بە بۆنەی ئازادکردنی شاری شنگال و جەژنی ئێزدییەکانەوە، هاوکاریی داراییی بەسەر 130 قوتابییە سێوی (بێ دایک و باوک)ـدا دابەش کرد؛ بەیانییش لە شاریا هاوکاری دابەش دەکات.

(شێخ شامۆ) نوێنەری کوردانی ئێزدی لە پەرلەمانی کوردستان بە ماڵپەڕی فەرمیی پارتی دیموکراتی کوردستانی گوت: "بە هۆی هاتنی جەژنی ئێزدییەکان و ڕزگارکردنی شاری شنگال، ئەمڕۆ لە کۆمەڵگەی خانکێ هاوکاری داراییمان بەسەر ئەو 100 قوتابییە شنگالییەدا دابەش کرد کە داک و باوکیان نەماوە؛ ئەو 30 قوتابییەش کە لە پێشبڕکێی گوتنی تێکستا 'ئۆلا ئێزدیاتێ'ـدا بەشدار بوون، ئەوانیش دیارییان پێ درا؛ بنگەی لالش و لقی خانکێ و شنگال پێشبڕکێیەکەیان رێک خستبوو."

گوتیشی: "ئێمە وەک بنگەی لالش فۆرمێکی هاوکاریمان دروست کردووە بۆ ئەو قوتابیانەی دایک و باوکیان نەماوە؛ جا ئەو هەڵمەتە بەردەوام دەبێت؛ بەیانییش لە شاریا هەمان بەرنامەمان هەیە، بەشکەم ئەو منداڵانە لەو جەژنەدا بۆ خۆیان جلوبەرگێک بکڕن و، بە دڵێکی خۆشەوە جەژنی ئێزدیاتی بەڕێ بکەن".