سەرۆك بارزانی دەستخۆشیی لە سەرۆكوەزیرانی توركیا دەكات كە لە كۆبوونەوە فەرمییەكەی نێوانیاندا ئاڵای كوردستان دانراوە و پێزانینی بۆ ئەو هەڵوێستە هەبووە.

لە راگەیێندراوێكدا كە ئەمڕۆ پێنجشەممە 10-12-2015 سەرۆكایەتی هەرێمی كوردستان لەبارەی سەردانەكەی بارزانی بۆ توركیا بڵاویكردەوە، ئاماژەی بە ناوەڕۆكی كۆبوونەوەكانی كردووە لە ئەنكەرە.

سەرۆكایەتی هەرێمی كوردستان رایگەیاندووە، دوای نیوەڕۆی رۆژی چوارشەممە 9-12-2015 ڕەجەب تەیب ئەردۆغان، سەرۆككۆماری توركیا لە كۆشكی سەرۆكایەتی پێشوازی لە بارزانی و شاندی یاوەری كرد".



لە كۆبوونەكەدا، مەولوود چاوشئۆغلو، وەزیری دەرەوە و بیرات بەیڕەق وەزیری وزە، فەرەیدوون سینرئۆغلو، جێگری وەزیری دەرەوە، هاكان فیدان، سەرۆكی دەزگای هەواڵگریی توركیا ئامادە بوون.

سەرۆكایەتی هەرێمی كوردستان ئاماژەی بەوەكردووە "سەرۆككۆماری توركیا بە گەرمی بەخێرهاتنی بارزانی كردووه و پیرۆزبایی سەركەوتنی پێشمەرگەی لە ئازادكردنی شنگال لە سەرۆك بارزانی كرد".

راشیگەیاندووە، بارزانی و ئەردۆغان بارودۆخی هەرێمایەتی، نێودەوڵەتی و دوایین گۆڕانكارییە سیاسییەكانی ناوچەكەیان تاوتوێ كردووە.

لەبارەی بابەتی هاتنی سوپای توركیا بۆ باشیك لە پارێزگای نەینەوا، سەرۆكایەتی هەرێمی كوردستان رایگەیاند، ئەو پرسە تاوتوێ كرا و جەخت لەوە كرایەوە كە ئەو بابەتە لە ڕێگەی دیالۆگەوە چارەسەر بكرێت.

سەرۆكایەتی هەرێمی كوردستان دەشڵێت لە كۆبوونەوەكەی بارزانی و ئەردۆغان باس لە پەیوەندییە سیاسی و ئابوورییەكانی نێوان هەرێمی كوردستان و وڵاتی توركیا كرا و، بە پێویست زانرا كە ئەو پەیوەندییانە فراوانتر بكرێن.

لەبارەی كۆبوونەوەكەی بارزانی لەگەڵ ئەحمەد داودئۆغلۆ، سەرۆكوەزیرانی توركیا، سەرۆكایەتی هەرێمی كوردستان رایگەیاندووە " سەرۆكوەزیرانی توركیا خۆشحاڵیی خۆی بۆ سەردانی بارزانی بۆ توركیا نیشاندا و وێڕای ئاماژەدان بە پەیوەندییەكانی نێوان هەردوولا ڕایگەیاند كە سەقامگیری و ئاساییشی هەرێمی كوردستان بۆ توركیا جێگەی بایەخە و ئاساییشی توركیاش بۆ تەواوی ناوچەكە گرنگیی خۆی هەیە".

بەگوێرەی راگەیێندراوەكەی سەرۆكایەتی هەرێمی كوردستان "سەرۆكوەزیرانی توركیا جەختی لە دۆستایەتیی نێوان هەرێمی كوردستان و وڵاتەكەی كردەوە و ڕاشیگەیاند كە لە شەڕی دژی تیرۆریستانی داعش دەبێ هەردوولا هاوكاری یەكتر بن، چونكە تیرۆریستانی داعش دوژمنی هاوبەشی هەردوولان. هەروەها ئاماژەیشی بە ڕۆڵی سوپای توركیا دا لە مەشق و ڕاهێنانی بەشێك لەو پێشمەرگانەی كە بەشداریان لە ئازادكردنی شنگالدا هەبووە".

لە بەشێكی دیكەی كۆبوونەكەی بارزانی و داودئۆغلۆ باس لە قۆناغەكانی هەڵوێست و پەیوەندیی دەوڵەتی توركیا لەگەڵ گەلی كورد كراوە و ئەو پێشڤەچوونانە خرانەڕوو كە لەم بوارەدا هاتووەتە ئارا.

سەرۆكایەتی هەرێمی كوردستان دەڵێت "بۆ یەكەمجار لە مێژووی سەردانی شاندە باڵاكانی هەرێمی كوردستان بۆ توركیا لە كۆبوونەوەكەی نێوان بارزانی و سەرۆكوەزیرانی توركیادا ئاڵای كوردستان لە تەك ئاڵای عێراق و توركیا دانرابوو و، بەو هۆیەشەوە بارزانی دەستخۆشیی لە داودئۆغلۆ كرد كە لە كۆبوونەوە فەرمییەكەی نێوانیاندا ئاڵای كوردستان دانراوە و پێزانینی بۆ ئەم هەڵوێستە هەبوو".





رووداو