نوێنەری کوردانی ئێزدی لە پەرلەمانی کوردستان ڕایگەیاند، دەڤەری شنگال تا ئێستا زیاتر لە 17 گۆڕی بەکۆمەڵی لێ دۆزراوەتەوە، گەڕان بە دوای گۆڕی دیکەیش بەردەوامە، هەوڵ دەدرێت ئەو گۆڕانە بە شێوەیەکی زانستیانە هەڵبدرێنەوە.

(شێخ شامۆ) نوێنەری کوردانی ئێزدی لە پەرلەمانی کوردستان، بۆ ماڵپەڕی فەرمیی پارتیی دیموکراتی کوردستان گوتی: "تا ئێستا لە شنگال و دەوروبەریدا 17 گۆڕی بەکۆمەڵ دۆزراونەتەوە، تەنیا دوای ئازادکردنی شنگال زیاتر لە 12 گۆڕی بەکۆمەڵ دۆزراونەتەوە، کە هەندێک لەو گۆڕانەی پێش ئازادکردنی شنگال دۆزراونەتەوە هەڵدراونەتەوە و بە دەیان ڕوفاتیان لێ دەرهێنراوە."

گوتیشی: "سەنتەری لێکۆڵینەوە کار بۆ هەڵدانەوەی گۆڕەکانی دیکەیش دەکات بۆ ئەوەی بە شێوەیەکی زانستیانە هەڵبدرێنەوە، ئەوەیش شتێکی زۆر باشە بۆ ئەوەی ئەو گۆڕانە لە دەستکاری و تێکدان بپارێزرێن، چونکە زۆر پێویستە کەسانی شارەزا ئەو گۆڕانە ببینن و هەڵبدنەوە، بۆ ئەوەی دیکۆمێنت بکرێن، بۆ ئەوەی کارەساتی شنگال بە جینۆساید بناسرێت، بۆیە داوا لە هاووڵاتیان دەکەین لە کاتی دۆزینەوەی گۆڕە بەکۆمەڵەکان دەستکاری نەکەن و لایەنە پەیوەندیدارەکان ئاگادار بکەنەوە تا ببێتە بەڵگە بۆ ئەو کارەساتەی بەسەر کوردانی ئێزدیدا هاتووە".