بەداوەتێكی فەرمی و پڕ لە ڕێزەوە لەلایەن میرنیشینی یەكگرتووی عەرەبی و شانشینی عەرەبی سعودیا، بەڕێز مسعود بارزانی سەرۆكی هەرێمی كوردستان سەردانی هەردوو وڵاتی كرد بۆ پتەوتركردنی پەیوەندیەكانی نێوان هەرێم و ئەم دوو وڵاتە و هەروەها لەنێوان عیراق و پێكهاتەكانی لەگەڵ هەردوو وڵاتی دۆست، لەمیانەی دیدار و سەردانەكانی سەرۆك بارزانیدا چەندین دۆسێی گرنگ هاتنە بەر باس و گفتوگۆ، لە پێشەوەی دۆسێكانیشدا پرسی شەڕی دژی داعش و پەیوەندی ئابوری و دیپلۆماسی لەنێوان عیراق بەگشتی و كوردستان بە تایبەتی لەگەڵ هەردوو وڵاتدا، هەروەها پرسی ئەو ئاوارە و پەنابەرانەی لە هەرێمی كوردستان نیشتەجێن.

بەداخەوە، ژمارەیەك لە دەزگاكانی راگەیاندن هەواڵی وایان بڵاو كردەوە گوایە هەرێمی كوردستان، یارمەتی دارایی لە شانشینی عەرەبی سعودیاوە دەستكەوتووە، بۆیە دووپاتی دەكەینەوە لەو بارودۆخەدا و لەو كاتەی كە پرسی ئاوارەكان پێویستی بە یارمەتی و پاڵپشتیەكی زۆر هەیە، سەرتاپای ئەم هەواڵە دوورە لە ڕاستی و هیچ بنەمایەكی نیە.

عیراق بەگشتی و هەرێمی كوردستان، پێویستی بە یارمەتی وپاڵپشتی هەموو وڵاتانی دراوسێ و دۆستانی هەیە بە تایبەتی ئێستا كە لەشەڕێكی زۆر سەخت و قەیرانێكی قووڵی ئابوریدایە، بۆیە لەسەردانەكەی سەرۆك بارزانی بۆ هەردوو وڵاتدا ئەم پرسە زۆر بەڕوونی جەختی لەسەر كرایەوە و مەترسیەكانی بەشێوەیەكی راشكاوانە خرانەڕوو.

سەرۆكایەتی هەرێمی كوردستان

5ـی كانوونی یەكەم 2015ـى زايينى