(سه‌رۆك بارزانی) له‌ مه‌ڕاسیمی ساڵیادی كۆچی دوایی دۆستی دێرینی گەلی کورد، خاتوو دانیال میتێران رایگه‌یاند كه‌، کورد و کوردستان قەرزداری ئەو خاتوونەین و هەمیشە یادی بە زیندوویی دەمێنێتەوە.

ئەمڕۆ دووشەممە ٢٣ـی١١ـی٢٠١٥ (مەسعوود بارزانی) سەرۆکی هەرێمی کوردستان بەشداریی لە مەڕاسیمی ساڵیادی کۆچی دوایی دۆستی دێرینی گەلی کورد، خاتوو دانیال میتێران، کرد.
لەو مەڕاسیمەدا کە لەژێر چاودێریی حکوومەتی هەرێمی کوردستان و لەلایەن دەزگای ڕۆشنبیریی و هونەریی شڤان پەروەر، بە بۆنەی چوارەمین ساڵیادی کۆچی دوایی خاتوو دانیال میتێران ڕێکخرابوو، سەرەتا سەرۆک بارزانی پێشانگەیەکی فۆتۆگرافی بەسەر کردەوە کە کۆمەڵێک وێنەی خاتوو دانیال میتران لە قۆناغە جیاجیاکانی پشتگیریی ئەو دۆستە دێرینەی گەلی کوردستان نماییش کرابوون. هەر لە مەراسیمەکەدا سەرۆک بارزانی وتەیەکی پێشکەش کرد و ئاماژەی بە ڕۆڵی خاتوو دانیال میتێران و وڵاتی فەڕەنسا لە پشتگیرییکردنی گەلی کوردستان کرد و ڕایگەیاند: کورد و کوردستان قەرزداری ئەو خاتوونەین و هەمیشە یادی بە زیندوویی دەمێنێتەوە.

(سەرۆک بارزانی) هەروەها ئاماژەی بە پەیوەندیی نێوان وڵاتی فەڕەنسا و گەلی کوردستان کرد و ڕایگەیاند: پەیوەندیی فەرەنسا و گەلی کوردستان لەمێژینەیە و هەمیشە وەک دۆست و پشتیوان سەیری فەڕەنسامان کردووە، لەکاتی پەلاماری تیرۆریستان بۆسەر کوردستان، سەرۆکی فەڕەنسا هاتە هەولێر، ئەوە پشتیوانییەکی مەزن بوو بۆ گەلی کورستان. ئاماژەشی بەوە کرد کە پەلاماردانی فەڕەنسا لەلایەن تیرۆریستانەوە بەهۆی ئەو هەڵوێستانەوە بوو، هەر بۆنەیەشەوە (سەرۆک بارزانی) جارێکی دیکە سەرەخۆشیی لە قوربانییانی ئەو کردەوە تیرۆریستییانە کرد و ڕایگەیاند:ئەو کردەوە تیرۆریستییانە دەریخست کە تیرۆریستان دوژمنی هەموومانن و دەبێ هەموو جیهانی ئازاد هەڵوێستەکانیان لە دژی تیرۆ یەک بخەن.
(سەرۆک بارزانی) ڕاشیگەیاند: مانەوەی تیرۆریستان تەنیا کاتییە و هیچ داهاتوویەکیان نییە.

هەر لە مەراسیمەکەدا وتاری حکوومەتی هەرێمی کوردستان و ئالان گیبخات کونسووڵی گشتیی فەڕەنسا لە هەولێر و ژێلبرێت میتران کوری خاتوو میتران و چەند وتاریکی تر پێشکەش کران و فیلمێکی دۆکیۆمێنتاری لەسەر ژیانی خاتوو میتران و هەڵوێستەکانی بۆ پشتگیریی گەلی کوردستان نماییش کرا.