دیارە ھەواڵێک لە چەند ماڵپەرێکی کوردیدا بڵاو کراوەتەوە کە لە ماڵپەرێکی ئیتاڵی بە ناوی ئیل مانیفیستۆی گواستوویانەتەوە و، تێیدا ھاتووە بەرپرسی میحوەری باشیک (حەمید ئەفەندی) باسی لەوە کردووە، یەپەگە ھاوکاریی ھێزی پێشمەرگە کردووە لە پرۆسەی ڕزگارکردنی شنگالدا، کەچی (حەمید ئەفەندی) دەڵێ، بە ھیچ جۆرێک لێدوانی دەربارەی پرۆسەی ڕزگارکردنی شنگال نەداوە، چونکە ئەو لەو شەڕەدا نەبووە.

بەرپرسی میحوەری باشیک فەرماندە (حەمید ئەفەندی) بە ماڵپەڕی فەرمیی پارتیی دیموکراتی کوردستانی ڕاگەیاند: "ئەو دەنگۆیەی لە زاری منەوە بڵاویان کردووەتەوە ڕاست نییە، چونکە من ھیچ لێدوانمان لەبارەی شنگال نەداوە، خۆم بەشداریم لەو پرۆسەیە نەکردووە و من بەرپرسی میحوەرێکی دیکەم لە شەڕی دژ به‌ داعشدا."

فەرماندە (حەمید ئەفەندی) گوتیشی، من لە شەڕێکدا بەشداریم نەکردبێت و، دوور بێت لێمەوە، چۆن لە خۆمەوە دەربارەی لێدوان دەدەم؛ چوزانم کێ لەو شەڕەدا بەشدار بووە و، کێ بەشدار نەبووە؛ دیارە ئەوەی شەڕی تیرۆریستانی داعش دەکات ھێزی پێشمەرگەیە، بەڵام من خۆم کە لە شوێنێکدا نەبم قسەی لەبارەوە ناکەم.

گوتیشی، ئەو قسانەی بڵاو کراوەتەوە لەخۆڕا دروست کراوە، چونکە من بە ھیچ جۆرێک لێدوانم لەبارەی شنگال نەداوە و ئەوەی بڵاو کراوەتەوە درۆیە.